१/
उडी गो मन ठेगान छैन चंगा उड्या जन,
सदाइभरि एकोहोरिनो बहुरिन्या मन ।
२/
आकाश उडन्या चरी मेरी खबर लैजा,
लामा छन मैदानी बाटो गर्खा बाटो गैजा ।
३/
परदेश बइजानो भया ख्याल अर्या घर
ईश्वर हजुर रक्षा गर्या छाड्या तम्रा भर ।
४/
खेतजिउला पानी लाया मार्सि धान फलेन,
परदेशीका झिक्कै पिडा दुख कैलै गएन ।
५/
आजभोल बस्यारो काछँ कोइलीका हुल,
समराइ लाग्दी उन्की क्या भई होइ भुल ।
६/
एक्ली कसरी अरु घाँस दाउरा वनपाखा,
साइकी तस्विर हेरिरन्छु फुट्न्जेल यी आँखा ।
७/
बाउस्या नपाई बाजो रैगो गैरी सेरी खेत,
गाई कस्या पाल्लो हो मैले नैहुन्या बन बेत ।
८/
उर्लि आयो बाडी कठै जम्मै लैगयो बस्ती ,
धै भन्ना सरकार लाटो नेताकी भै मस्ती ।
९/
उर्ली भेल माछो खान आइगई रानी चडा ,
राम जसी भैगयो भ्यागुतो जम्मा मेरी गडा ।
१०/
परदेश निकरी जाया रुनी तम्री सुवा,
घरपरिवार् सम्झि जाया जनखेल्या जुवा।
✍️शर्मिला श्रेष्ठ,ललितपुर
हाल अमेरिका
