तितोपाटी- सरकारले नेपालको एक मात्र अन्तर्राष्ट्रिय हवाई नाका त्रिभुवन विमानस्थलभित्र आफन्तको स्वागत र बिदाइका लागि जान रोक लगाएको छ ।
त्रिभुवन अन्तर्राष्ट्रिय विमानस्थल नागरिक उड्डयन कार्यालयले एक सूचना जारी गर्दै नेपालमा कोरोना भाइरसको नयाँ भेरिन्टका संक्रमित बढेकाले विमानस्थल हाताभित्र स्वागत तथा बिदाइ कार्यक्रमलाई निरुत्साहित गरिएका जनाएको हो । उड्डयन कार्यालयले अत्यावश्यक अवस्थाबाहेक विमानस्थलमा प्रवेश नगर्न पनि अपिल गरेको छ ।
त्यस्तै, विमानस्थलमा आवतजावत गर्दा अनिवार्य रूपमा मास्क प्रयोग गर्न, शरीरको तापक्रम मापन गराएर टर्मिनल भवनभित्र प्रवेश गर्न, सेनिटाइजरको प्रयोग गर्न पनि अनुरोध गरेको छ ।
लाइनमा लाग्दा भीडभाड नगरी तोकिएको सांकेतिक पाइला पछ्याउन र अन्य स्थानमा बस्दासमेत भौतिक दूरी कायम गर्न उड्डयन कार्यालयले अनुरोध गरेको छ ।
त्रिभवन विमानस्थलबाट स्वदेश तथा विदेशमा यात्रा गर्ने यात्रु, विमानस्थल सुरक्षाकर्मी, वायुसेवाका कर्मचारी लगायतलाई पनि स्वास्थ्य तथा जनसंख्या मन्त्रालयले तय गरेको स्वास्थ्य मापदण्ड पालना गर्न आग्रह गरेको छ । शिलापत्रबाट
