तीतोपाटी -अस्ट्रेलियाले कोभिड–१९ विरुद्धको खोप परीक्षण रोकेको छ । युनिभर्सिटी अफ क्विन्सल्यान्ड र बायोटेक कम्पनी सीएसएलले संयुक्त रूपमा निर्माण गरिरहेको खोपको प्रतिक्रिया नकारात्मक देखिएपछि परीक्षण रोकिएको हो ।
स्थानीय सञ्चारमाध्यमका अनुसार परीक्षणका क्रममा उक्त खोपले एचआईभी पोजिटिभको नतिजा दिएको थियो । अस्ट्रेलियाले कोभिड–१९ नियन्त्रणका लागि निर्माण गरिरहेको यो पहिलो खोप हो । प्रधानमन्त्री स्कट मरिसन र स्वास्थ्यमन्त्री ग्रेग हन्टले खोप परीक्षण रोकिएको पुष्टि गरेका छन् । परीक्षणका क्रममा गलत रूपमा एचआईभी पोजिटिभको नतिजा दिए पनि यसले त्यस्तो समस्या हुने कुनै खतरा नरहेको उनीहरुको भनाइ छ ।
अस्ट्रेलिया सरकारले युनिभर्सिटी अफ क्विन्सल्यान्ड र सीएसएलले निर्माण गरिरहेको उक्त खोप सफल भएमा कम्तीमा ५ करोड डोज खरिद गर्ने सम्झौता गरेको थियो । तर खोप परीक्षण रोकिएसँगै उक्त कम्पनीले अस्ट्राजेनेकका तथा अक्सफोर्ड विश्वविद्यालयले निर्माण गरिरहेको खोप २ करोड डोज निर्माण गर्न लागेको जनाइएको छ ।
सरकारले अब अन्य कम्पनीले निर्माण गरेका खोप उपलब्ध गराउने प्रधानमन्त्री मरिसनले बताएका छन् । स्वास्थ्यमन्त्री हन्टले अस्ट्रेलियाले १४ करोड डोज खोप खरिद गर्ने निर्णय गरिसकेको जनाएका छन् । अस्ट्रेलियामा कोभिड–१९ बाट संक्रमित भएका २८ हजारमध्ये ९ सय ८ जनाले ज्यान गुमाइसकेका छन् भने ४९ जना निको हुन बाँकी छन् ।
