हजारौंको रगत र पसिनाको बलिदान हो संविधान।
संघीय लोकतान्त्रिक राज्यको मूल बिधान हो संविधान।।
शहिद, अपाङ्ग, टुहुरा र विधवाको सम्मानको लागि।
विश्व राजनीतिमा नेपालको पहिचान हो संविधान।।
स्वतन्त्रता, अखण्डता र समान आकांक्षाको कदर गर्ने।
बहुजाति बहुभाषी नेपालीको साझा बगान हो संविधान।।
नेपालको राष्ट्रियता र सिमानाको सुरक्षा गर्नलाई।
सार्वभौमसत्ता सम्पन्न जनताको निशान हो संविधान।।
सुखी नेपाली र समृद्ध नेपालको नारा साकार बनाउने।
भ्रष्टाचार रहित सुशासनको स्वाभिमान हो संविधान।।
कागजमा मात्रै सिमित राखि कार्यान्वयन नगरेमा।
तीन सय आठ धारा नौ सूचीको एक थान हो संविधान।।
धर्मिला कार्की
महाराजगंज, काठमाडौँ