तितोपाटी – कोरोना भाइरस (कोभिड–१९) बाट युरोपमा सबैभन्दा बढी प्रभावित बेलायतमा कोरोना संक्रमण पुनः दोहोरिएको छ । प्रधानमन्त्री बोरिस जोन्सनले बेलायतमा भाइरसको दोस्रो लहर (वेभ) आइसकेको बताउँदै सरकारले थप कडाइ गर्न विचार गरिरहेको बताएका छन् । प्रधानमन्त्री जोन्सनले संक्रमण रोक्नका लागि अलिक कडा खालका प्रतिबन्ध लगाउनुपर्ने अवस्था आउन सक्ने पनि बताएका छन् ।
यसअघि बेलायत सरकारद्वारा गठित एउटा वैज्ञानिक समितिले बेलायतमा आउँदो जाडोयाममा कोरोना भाइरस (कोभिड–१९) का कारण हजारौंको ज्यान जान सक्ने चेतावनी दिएको थियो । बेलायतको स्वास्थ्य तथा सामाजिक व्यवस्था मन्त्रालयले केही हप्तायताको स्वास्थ्य अवस्था निकै नै नाजुक बन्दै गएको बताउँदै मे महिना देखि न्यून रहेको संक्रमित थपिने क्रम पुनः थपिएपछि चिन्ता जनाएको छ ।
दुई सातायता संक्रमण बढ्न थालेपछि इंग्ल्यान्डमा कतिपय क्षेत्रमा कडा प्रतिबन्ध सुरु भइसकेको छ । हाल त्यहाँ तीन दिन यता दैनिक ४ हजार भन्दा बढि संक्रमितहरू थपिन थालेका छन् । नर्थ इस्ट इंग्ल्यान्डमा कोभिड–१९ संक्रमण नियन्त्रणका लागि थप कडाइ गरिएको छ । सरकारी घोषणाअनुसार गत बिहीबार मध्यरातदेखि त्यस क्षेत्रका करिब २० लाख मानिस अर्को परिवारसँग घुलमिल हुन वञ्चित भएका छन् । बार, पबका लागि १० बजेपछि कफ्र्यु लगाइएको छ ।
हाल बेलायतमा ३ लाख ८१ हजार भन्दा बढि मानिसहरू कोरोना संक्रमित भइसकेका छन् भने ४१ हजार भन्दा बढिको मृत्यु भइसेको छ ।
