तितोपाटी – अक्सफोर्ड विश्वविद्यालयको कोरोना विरूद्धको खोप परिक्षण तत्कालको लागि स्थगित गरिएको छ । अक्सफोर्ड विश्वविद्यालय र एस्ट्राजेनेकाले विकास गरेको कोरोना भाइरस विरुद्धको खोपको अन्तिम चरणको परीक्षण हाललाई स्थगित गरिएको हो । परीक्षणमा सहभागी एक व्यक्ति बिरामी भएकाले तत्कालका लागि खोप परीक्षण स्थगित गरिएको हो । ती व्यक्ति कसरी बिरामी भए भन्ने अनुसन्धान भइरहेको र त्यो पत्ता लागेपछि मात्रै खोपको परीक्षणलाई पुन: सञ्चालन गरिने एस्ट्राजेनेकाले बताएको छ ।
अक्सफोर्ड र एस्ट्रेजेनेकाले विकास गरेको खोपमा विश्वकै ध्यान केन्द्रित थियो । विश्वका विभिन्न देशमा करिब एक दर्जन जति खोप परीक्षणमा रहे पनि अक्सफोर्डले बनाइरहेको खोप सबैभन्दा अगाडि रहेको बताइएको थियो । पहिलो र दोस्रो चरणको परीक्षण सफल भएपछि छिट्टै नै अक्सफोर्ड र एस्ट्राजेनेकाले बनाएको खोप आम प्रयोगमा आउन सक्ने अनुमान गरिएको थियो । बीबीसीका अनुसार तेस्रो चरणको परीक्षणमा अमेरिका, बेलायत, ब्राजिल र दक्षिण अफ्रिकामा गरी करिब ३० हजार जनालाई सहभागी गराइएको थियो ।
विश्व स्वास्थ्य संगठन(डब्लूएचओ)का अनुसार विश्वभर करिब १८० वटा खोपका बारेमा अध्ययन अनुसन्धान भइरहेको छ । तर कुनै खोपको पनि ‘क्लिनिकल ट्रायल’ पूरा भएको छैन । डब्लूएचओको आवश्यक चरण र सुरक्षा मापदण्डबिना कोरोना खोप प्रयोगमा ल्याए त्यसले गम्भीर परिणाम उत्पन्न हुने चेतावनी दिँदै आएको छ ।
