तितोपाटी- कतारमा सन् २०२२ मा आयोजना हुने फिफा विश्वकप छनोट अन्तर्गत एसिया छनोटको दोस्रो चरणको पहिलो खेलमा नेपालले लज्जास्पद हार व्यहोरेको छ ।
बिहिबार राति भएको पहिलो खेलमा नेपालले कुवेतसँग कुवेतस्थित कैफानको मैदानमा ७-० गोलको लज्जास्पद हार व्यहोरेको हो । जविर अल अहमेद ईन्टरनेश्नल मैदानमा कुवेतलाई जित दिलाउन युसेफ नासिरले दुई गोल गरे । यस्तै अब्दुल्लाह मावी र फहाद अल हाजेरी, बदेर अल मुट्वा, रिडा हानि र हुसेन अल मोसाविले एक एक गोल गरे ।
बलियो टिम कुवेतविरुद्ध पहिलो हाफमा २-० ले पछि परेको नेपालले दोस्रो हाफमा थप पाँच गोल खाएको थियो । खेलको छैटौं मिनेटमा नासिरले गोल गर्दै कुवेतलाई सुरुवाती अग्रता दिलाएका थिए । १४ औं मिनेटमा अल हाजेरीले गोल गर्दै कुवेतलाई पहिलो हाफमा २-० को अग्रता दिलाएका थिए ।
दोस्रो हाफमा नेपालमाथि कुवेतले गोलको वर्षा गर्यो । खेलको ५१ औं मिनेटमा नासिरले व्यक्तिगत दोस्रो गोल कुवेतलाई ३-० को अग्रता दिलाए । ५९ औं मिनेटमा अब्दुल्लाहले गोल गर्दा कुवेत ४-० ले अघि रह्यो । खेलको ८६ औं मिनेटमा अल मुट्वाले गोल गर्दै घरेलु टोलीको अग्रता ५-० को बनाए । त्यसपछि थप गरिएको इन्जुरी समयमा नेपालले दुई गोल खायो । इन्जुरी समयको चौंथो मिनेटमा हानिले गोल गर्दै कुवेतको अग्रता ६-० र इन्जुरी समयको सातौं मिनेटमा मोसाविले गोल गर्दै कुवेतलाई ७-० को जित दिलाए ।
उक्त खेलमा कुवेतस्थित कर्यरत नेपालीहरुको बाक्लो उपस्थित रहेको थियो सुरुवाती समयमा देखिने निकै उत्साहित रहेका दर्शकहरु अन्तिम समय सम्म पनि हुटिंग निरन्तर जारी रहेको थियो। त्यसै क्रममा ७-० को लज्जास्पद हार संगै उपस्थित दर्सक निरास बन्दै खेल मैदान बाट बाहिरिएका थिए।
कुवेतसँगको फराकिलो हारसँगै समूह ‘बी’ को नेपालले विश्वकप छनोटमा खराब सुरुवात गरेको छ । कुवेतले भने पहिलो खेलमा ३ अंक जोडेको छ । यस समूहमा जोर्डनले पनि विजयी सुरुवात गरेको छ । जोर्डनले चाईनिज ताईपेलाई २-१ गोल अन्तरले पराजित गरेको छ ।
अब नेपालले भदौ २४ गते ताईपेसँग उसैको मैदानमा खेल्नेछ ।
