तितोपाटी – चीनको उत्तरपूर्वी प्रान्त ल्याओनिङमा जुलाई ३ तारिख बुधबार आएको आँधी बाट ६ जनाको मृत्यु हुनुकासाथै ११० जना भन्दा बढि घाइते भएका छन् । ल्याओनिङ प्रान्तको खाइयुआन शहरमा बुधबार दिउँसो ५ बजेर १५ मिनेट जाँदा आएको तोर्नेदो नामको आँधीले शहरको आर्थिक विकास क्षेत्रलगायत आवासीय भवनमा ठूलो क्षति पुर्याएको छ । करिब १५ मिनेटसम्म आएको तोर्नेदोको गति २३ मिटरप्रति सेकण्ड थियो ।
तोर्नेदो वायुको विशाल स्तम्भको रूपमा आकाश छेडन गर्दै गएको भयानक भिडियो भाइरल बनेको छ । उक्त प्राकृतिक प्रकोपपछि खाइयुआन शहरले तुरुन्तै दुई तहको आकस्मिक उद्धार शुरु गरेको छ । हाल उद्धार दल, आकस्मिक सेवा, चिकित्सा क्षेत्रलगायत सबैलाई उद्धार कार्यमा संलग्न हुन स्थानीय सरकारले निर्देशन दिएको छ । हालसम्म २१० जना प्रभावित मानिसको उद्धार गरिसकेको छ । साथै चीनको हाइनान प्रान्तमा मुन नामक ताइफुन आएको छ । प्रान्तीय जलवायु विभागले चीनमा यस वर्षको यो पहिलो आँधी भएको उल्लेख गरेको छ ।
हालसम्म कुनै जनधनको क्षति नभएको र डुंगा सेवा स्थगित गर्नुका साथै हवाई उडान रद्द वा विलम्ब गरेको जनाइएको छ । साथै सम्भावित क्षेत्रका स्थानीयलाई सतर्क रहन सूचना जारी गरिएको छ ।
