तितोपाटी – चीनको दक्षिण-पश्चिम क्षेत्रमा एक हप्तादेखिको अविरल वर्षाको कारण १७ जनाको मृत्यु भएको छ । गौन्छी झुङ स्वशासित क्षेत्रमा आएको अत्यधिक वर्षाका कारण उनीहरुको मृत्यु भएको आपत्कालीन विभागका अधिकारीहरुले बुधबार जनाएका छन् । निरन्तरको वर्षाका कारण सयौं घर र हजारौं हेक्टरमा लगाइएको बालीनालीसमेत नष्ट भएको अधिकारीहरुले बताएका छन्। अझै केही दिनसम्म पानी पर्ने क्रम जारी रहने अनुमान गरिएको छ।
झण्डै एक हप्तादेखि अविरल वर्षाका कारण ५ लाख ९० हजार मानिस प्रभावित भएको उनीहरुको भनाइ छ । प्राप्त पछिल्लो विवरणअनुसार ३० हजारभन्दा बढी स्थानीय बासिन्दा विस्थापित भएका छन् । उनीहरुलाई अन्य ठाउँमा अस्थायी बसोबासको व्यवस्था गरिएको छ । अत्यधिक वर्षाका कारण बाढी पनि आएको छ । बाढीले ३४ हजार ६ सय हेक्टर जमिनको बाली नष्ट गरिदिएको छ ।
अधिकारीहरुले दिएको जानकारी अनुसार अहिलेसम्म झण्डै एक हजार ७४७ घरमा वर्षा र बाढीले असर पारेको छ भने तीमध्ये ९६६ वटा घर नराम्रोसँग क्षति भएका छन् । भारी वर्षाका कारण आएको बाढीले नौवटा सहरलाई डुबाएपछि जियांग्सी प्रान्तमा मात्रै एक लाख ५० हजार मानिसलाई अन्यत्रै सारिएको छ। त्यसैगरी दक्षिण–पश्चिमी ग्वाङ्सी प्रान्तमा रहेका दुई लाखभन्दा बढी घरमा विद्युत् आपूर्ति बन्द भएको बुझिएको छ भने वर्षाले निम्त्याउन सक्ने सम्भावित पहिरोबाट सजग हुनसमेत सो क्षेत्रका स्थानीय प्रशासनले सर्वसाधारणलाई आग्रह गरेको छ। मुसलधारे वर्षाका कारण दक्षिणी चीनमा पहिरो गएका दृष्टान्त रहेकाले अधिकारीहरुले सजगता अपनाउन आग्रह गरेका हुन्।
