तितोपाटी – पाकिस्तानको नयाँ राष्ट्रपतिमा सत्तारूढ दल पाकिस्तान तेहरिक ए–इन्साफ (पीटीआई) का नेता अरिफुर रेहमान अल्भी निर्वाचित भएका छन् । पाकिस्तानको नयाँ राष्ट्रपतिका लागि मङ्गलबार भएको मतदानमा अन्य प्रतिद्वन्दीलार्इ भारी मतले पछि पार्दै नेता अल्भी राष्ट्रपति पदमा निर्वाचित भएका हुन । राष्ट्रपतिय निर्वाचनको लागि संसदका दुबै सदन र चारवटा प्रान्तीय सभाका एक हजारभन्दा बढी सांसदहरुले भाग लिएका थिए ।
प्रधानमन्त्री इमरान खानका निकटस्थ पूर्व चिकित्सक आरिफ अल्भीको विजयले प्रधानमन्त्री इमरान खानलाई सत्ता सञ्चालनमा धेरै ठूलो सहयोग पुग्ने विश्लेषकहरुले अनुमान गरेका छन् ।
पाकिस्तानको १३ औं राष्ट्रपतिमा निर्वाचित भएलगत्तै उनले ‘आफू दलको मात्र नभई समग्र राष्ट्रको राष्ट्रपति भएको’ प्रतिक्रिया दिएका छन् । उनले प्रधानमन्त्री इमरान खानलाई राष्ट्रपतिको उम्मेदवार बनाएकोमा धन्यवादसमेत दिए ।
निर्वाचन आयोगका अनुसार अल्भी ३ सय ५३ मतसहित निर्वाचित भएका हुन् । उनको निकटतम प्रतिद्वन्दी फजलुर रेहमानले १ सय ८५ मत प्राप्त गरे । त्यसैगरी १ सय २४ मत पाएका पाकिस्तान पिपुल्स पार्टीका अैतजाज अहसान तेस्रो स्थानमा रहे ।
पाकिस्तानमा हाल मामुन हुसैन राष्ट्रपति पदमा छन् । उनको कार्यकाल यहि सेप्टेम्बेर ९ मा समाप्त भए लगत्तै नवनिर्वाचित राष्ट्रपति अल्भिले सपथ ग्रहण गर्ने छन् ।
