तितोपाटी – गोरखामा एक युवती आफुले जन्माएको नवजात शिशुको हत्या गरेर माटोमा पुरेको अभियोगमा प्रहरीले पक्राउ गरेको छ । अन्तरजार्तिय विवाह गरेका कारण माइतीले धम्की दिएको हुंदा आफुले छोरीको हत्या गरेर माटोमा पुरेको भन्दै ति युवतीले प्रहरीमा बयान दिएकी छन् ।
गोरखा सिरानचोक गाउँपालिका २ थालाजुङकी १७ वर्षकी रश्मी गुरुङले छोरी जन्मिएको ११ दिनमा उनको हत्या गरेर माटोमा पुरेकी हुन् । उनले माइती पक्षले छोरी र श्रीमानलाई मार्ने धम्की दिएपछि आफुले त्यस्तो कदम चालेको प्रहरी समक्ष बताएकी छन् ।
रश्मीले जन्माएको छोरीको भदौ ८ गते न्वारान गरिएको थियो । न्वारान गरेकै दिनको राती उनले छोरी हराएको भनेर हल्ला गरिन् । उनले हारगुहार मागेपछि प्रहरीले घटनाको अनुसन्धान सुरु गर्यो । तर रश्मी आफैले छोरीको हत्या गरेर घर नजिकैको बारीमा खाल्डो खनेर पुरेको अवस्थामा भेटिएको प्रहरीले जनाएको छ । प्रहरीले रश्मीलाई पक्राउ गरेर घटनावारे थप अनुसन्धान गरेको जनाएको छ ।
रश्मी र थालाजुङ खामबारीका सबल भण्डारीको विवाह भएको थियो । उनीहरुवाट जन्मिएको छोरीको भदौ ८ गते न्वारन सकियो । सासुसंगै एउटै कोठामा सुतेकी रश्मी छोरी रोएपछि राति १२ वजे तिर छोरी बोकेर घर भित्र बाहिर गरेको परिवारको सदस्यले बताए । रश्मीले प्रहरीमा दिएको बयान अनुसार राति छोरी रोए पछि घर बाहिर निक्केकी उनले पानी परेको बेलामा नजिकैको झ्यागंमा लगेर नवजात शिशुलाई लगेर फालेकी थिइन् । एकछिन पछि गएर हेर्दा पानीले निथ्रुक्क भिजेको बच्चा खाल्डो खनेर गाडेको उनले प्रहरी सामु बताएकी छन् । बारीमा खाल्डो खनेर छोरीलाई पुरेर आएपछि घरमा आएर हारगुहार माग्दै हल्ला गरेको उनले बताएकी छन् ।
आफ्नी आमाले धम्की दिएका कारण आफुले त्यसो गरेको रश्मीले प्रहरी सामु बताएकी छन् । छोरी हराएको भोलीपल्ट प्रहरीले रश्मी सहित उनको श्रीमान र सासुलाई समेत प्रहरी कार्यालय ल्याए पछि यस्तो रहस्य खुलेको हो । आफ्नो अन्तरजातिय विवाह भएका कारण माइती पक्षले बच्चालाई मार्ने धम्की दिएको रश्मीको भनाई छ । रश्मीले यस्तो बयान दिएपछि प्रहरीले उनको आमालाई पनि पक्राउ गरेको छ । रश्मीले बताएको ठाउंमा खाल्डो खनेर हेर्दा बोराभित्र शिशु मृत अवस्थामा भेटिएको प्रहरीले जनाएको छ ।
