तितोपाटी – सल्यानमा सात सय घरपरिवार पहिरोको जोखिममा परेका छन् । वर्षा सुरु भएसँगै पहिरो जान थालेपछि पहिरोको जोखिम बढेको भूसंरक्षण कार्यालय सल्यानले जनाएको छ ।
जोखिममा रहेका बस्तीहरुमा कपुरकोट गाउँपालिकाको कपुरकोट बजार, बागचौर नगरपालिकाको बाँफुखोला र कोटबारा, बनगाड कुपिण्डे नगरपालिकाको ब्युरेनी, निगालचुला र भदाले लगायतका बस्ती रहेका छन् ।
जंगल मासेर सडक निर्माण गरेकाले पहिरोको जोखिम बढेको कार्यालयका प्रमुख वीरेन्द्रप्रसाद पटेलले बताए ।
खर्सुबास गाउँ उच्च जोखिममा
पहिराेकाे जाेखिममा भएका बस्तीमध्ये छत्रेश्वरी गाउँपालिकाको खर्सुबास गाउँ उच्च जोखिममा रहेकाे छ । त्यस क्षेत्रमा गत तीन वर्षदेखि पहिरोले ठुलो क्षति पुर्याउँदै आएको छ । वर्षा हुन थालेपछि पहिरोको डरले रातभर जाग्रम बस्ने गरेको स्थानीय बताउँछन् । खर्सुवास गाउँमा विस २०६९ सालमा बीच भागबाट ठुलो पहिरो गएको थियो । गत वर्ष खोला नजिकैका पाँच घट्ट र दुई घर बगाएको थियो ।
त्यस्तै गत वर्ष कपुरकोट बजार क्षेत्रमा राप्ती लोकमार्गमा झन्डै सय मिटर भासिएको थियो । नजिकै रहेको कालिका माविका तीन वटा भवन भासिदा एक करोड बराबरको क्षति भएको थियो । बजार आसपासका चार हेक्टर खेती योग्य जमिनसमेत बगाएको स्थानीय खिमलाल गिरीले बताए ।
