तितोपाटी – पश्चिम रूकुममा यहाँका एक व्यक्तिले खुकुरी प्रहार गरी छोरा तथा भाइको हत्या गरेका छन् । मुसीकोट नगरपालिका–१४, लोरिवाङका ३६ वर्षीय शंकर विष्टले बुधबार बिहान ६ वर्षीय छोरा सुदर्शन विष्ट र २० वर्षीय भाइ गोकर्ण विष्टको हत्या गरेको प्रहरीले जनाएको छ ।
अन्धाधुन्ध खुकुरी तथा हसिया प्रहार गर्दा शंकरका अरु २ छोरा घाइते भएका छन् ।
छोरा, भाइको हत्या र २ छोरालाई घाइते बनाएपछि शंकर आफूले पनि आत्महत्याको प्रयास गरेको जनाइएको छ । शंकरले आफूमाथी पनि हसिया प्रहार गरेको खुलेको छ ।
शंकर तथा घाइते दुई छोरा १३ वर्षका प्रकाशसिङ विष्ट र ९ वर्षका दिनेश विष्टको जिल्ला अस्पताल सल्लेमा उपचार भैरहेको जिल्ला प्रहरी प्रमुख प्रहरी नायव उपरीक्षक सुमित खड्काले जानकारी दिए । घटनाको विस्तृत विवरण अँझै खुली नसकेको डिएसपी खड्काले बताए । शंकरको २ वर्षदेखि मानसिक सन्तुलन गुमेको सुन्नमा आएको प्रहरीले जनाएको छ ।
