इरानको राजधानी तेहरान नजिकै दुई दिनदेखि भारी वर्षाको कारण आएको बाढीमा परि कम्तीमा २४ जनाको मृत्यु भएको छ । उक्त बाढीमा परि अन्य १९ जना अझै बेपत्ता भएका छन् ।
‘पश्चिममा इमामजादेह दाउद गाउँ र तेहरानको पूर्वमा फिरौजकौह, रौदेहेन र दामाभान्ड क्षेत्रहरूमा भारी वर्षा र बाढीका कारण २४ जनाको मृत्यु भएको छ’ रेड क्रेसेन्ट सोसाइटीले जनाएको छ । बाढीमा हराइरहेका १९ जनाको खोजी भइरहेको जनाइएको छ ।
इरानको सुख्खा दक्षिणी क्षेत्रमा गत सप्ताह मात्रै आएको बाढीको कारण २२ जनाको ज्यान गएको थियो । एक साताभन्दा कम समयपछि तेहरान नजिकैको अल्बोर्ज पहाडको फेदमा बाढी आएको हो । इरानले विगत दशकमा बारम्बार खडेरीका अतिरिक्त मुसल धारे वर्षापछिको बाढी पनि सामना गरेको छ ।