संघीय संसदमा निलम्बित प्रधानन्यायधिश चोलेन्द्रशम्शेर जबराविरुद्ध परेको महाअभियोग प्रस्ताव सम्बन्धमा प्रकृया अगाडि बढेको छ । सो प्रकृयाको लागि संसदमा ११ सदस्यीय ‘महाभियोग सिफारिस समिति’ गठन गरिएको छ । प्रतिनिधिसभाको आइतबारको बैठकले महाभियोग सिफारिस समिति गठन गर्ने प्रस्ताव बहुमतले स्वीकृत गरेको हो ।
प्रधानन्यायाधीश जबराविरुद्ध फागुन १ मा महाभियोग प्रस्ताव दर्ता भएको थियो ।
महाअभियोग सिफारिस समितिमा एमालेका तर्फबाट विष्णु पाैडेल, लालबाबु पण्डित, शिवमाया तुम्बाहाम्फे, कृष्णभक्त पोखरेल रहेका छन् भने नेपाली कांग्रेसबाट मिनबहादुर बिक, रामबहादुर बिष्ट रहेका छन् । समितिका अन्य सदस्यहरमा माओवादीका तर्फबाट यसोदा सुवेदी र रेखा शर्मा, नेकपा समाजवादीका तर्फबाट कल्याणी खड्का, लोकतान्त्रिक समाजवादीबाट एकवाल मिया र जसपाबाट प्रमोद शाह रहेका छन् । उक्त समितिले अब अनुसन्धान कार्यविधि बनाएर अनुसन्धान प्रकृया अगाडि बढाउनेछ ।
प्रतिनिधिसभाको अर्को बैठक यही फागुन २९ गते आइतबार दिउँसो १ बजेका लागि बोलाइएको छ ।
