बोल्नु भन्दा कहिलेकाहीँ, नबोलेकै जाती लाग्छ।
आफ्नो जस्तो अरुको मन, नपोलेकै जाती लाग्छ।
दुःख पाउँदा खुशी हुने,सुखी देख्दा जल्ने सङ्ग,
जिन्दगीको कथा ब्यथा, नखोलेकै जाती लाग्छ।
बदलाको भाव राखी,जो कोहिलाई पिलाउन,
अमृतको सट्टामा विष, नघोलेकै जाती लाग्छ।
बजारमा सजिलै त्यो, किन्बेच हुने जस्तो गरि,
माया पिरतिको मुल्य, न मोलेकै जाती लाग्छ।
तिल जत्रो समस्यालाई, पहाड भन्दा ठुलो बनाइ,
नचाहिँदो कुरा गाउँमा, न ढोलेकै जाती लाग्छ।
प्रतिमा शिवाकोटी (उप्रेती)
भुम्लु गाउँपालिका,८ भुम्लुटार,काभ्रेपलान्चोक
(रचना: २०७८ फाल्गुन १७ मंगलबार)
