तितोपाटी- नेकपा (माओवादी केन्द्र) को स्थायी कमिटी बैठक पार्टी कार्यालय पेरिसडाँडामा सुरु भएको छ । सर्वोच्च अदालतले पूर्ववत रूपमा एमाले र माओवादी केन्द्र ब्युँताएपछि माओवादी केन्द्रको बैठक बस्न लागेको हो ।
बैठकमा आगामी रणनीतिका सम्बन्धमा छलफल हुने प्रवक्ता पम्फा भुसालले बताइन् । ‘अब कसरी अघि बढ्ने भन्ने विषयमा छलफल हुन्छ,’ उनले भनिन् ।
सर्वोच्च अदालतले तीन वर्षअघि एक भएको नेपाल कम्युनिष्ट पार्टी (नेकपा)लाइ मान्यता नदिइ नेकपा एमाले र माओवादी केन्द्र ब्युँताउने गरी फैसला गरेपछि माओवादी केन्द्रका अध्यक्ष प्रचण्डले आगामी रणनीति तय गर्न बैठक बोलाएका बताइएको छ ।
सर्वोच्च अदालतले अस्ति आइतबार नेपाल कम्युनिस्ट पार्टी (नेकपा) नाम ऋषि कट्टेललाई दिँदै एमाले र माओवादी ब्युँताउने गरी फैसला गरेको थियो । एमालेले आजै मात्र धुम्बाराहीस्थित आफ्नो पार्टी कार्यालयमा नेकपाको बोर्ड हटाएर नेकपा एमालेको बोर्ड राखिसकेको छ ।
