युक्रेनको राजधानी किभमा सोमवार बिहानै एकपछि अर्को गरी श्रृङ्खलाबद्ध विस्फोट भएका छन् । स्थानीय समय अनुसार बिहान ८ बजे भएको विष्फोटमा कैयौँ मानिसहरूको मृत्यु हुनुका साथै धेरै मानिसहरू घाइते भएको बीबीसीले जनाएको छ ।
रुसलाई क्रिमियासँग जोड्ने एकमात्र पुलमा विस्फोट भएको दुई दिनपछि कीभमा यी श्रृंखलाबद्ध विस्फोट भएका हुन् रुसी राष्ट्रपति भ्लादिमिर पुटिनले पुलमा भएको विस्फोटको लागि युक्रेनलाई दोष दिएका छन् ।
विष्फोट हुनुभन्दा ९० मिनेट अगाडि नै हवाई आक्रमणको साइरन बजेको समाचारमा बताइएको छ । सामाजिक सञ्जालमा साझा गरिएका तस्विर र भिडियोमा कीभका धेरै भवनहरूबाट धुवाँको मुस्लो उठेको देख्न सकिन्छ । भवन र कार पनि आगोले जलेको देखिएको छ । मध्य कीभमा भएको यो आक्रमणमा धेरै मानिसको मृत्यु भएको आशंका गरिएको छ ।
