“पाँच तत्त्व पाँचै विकार, पञ्चाङ्ग नै ठिक आधार”
पञ्चाङ्ग १
मुटुको धड्कन बनी बस्नु छ
आँखाको नानी भित्र नै पस्नु छ
अनुभव अनि अनुभूतिले
जङ्घार तर्न कम्मर कस्नु छ
उपलब्धीलाई घुँडा धस्नु छ ।
२
मायाका लागि जोडले कराए भन्छन्
देउराली भाकी कसम खाए भन्छन्
साङ्केतिक इशारा अचम्म रहेछ
विना सङ्कोछ मन मै सजाए भन्छन्
मिलाएर मुटु मै बास बसाए भन्छन् ।
३
अजम्बरी नै हुन्छ कसम खाएको दिन
उपलब्धी पक्का हुन्छ माया लाएको दिन
अतितलाई त भुल्न कहिल्यै सकिँदैन
सम्झनाको महल हुन्छ रमाएको दिन
बेशी धाएको दिन र फेरि गाएको दिन ।
४
किन हो मैनबत्ती निभायौ तिमीले
त्यही मौका छोपेर फसायौ तिमीले
स्थायी उपलब्धी हुन्छ हुन्न के थाहा
अनायासै निद्रामा उठायौ तिमीले
आज प्रेम युद्धमा हरायौ तिमीले ।
५
साच्चै तिमी त नजिक लागेन
व्यवहार पनि ठिक लागेन
हात साथ र जीवन मागेको
स्वीकार भाव मार्मिक लागेन
सोच्ने क्षमता अधिक लागेन ।
✍️प्रेम थापा “मन ” बागलुङ्ग
