सर्जक गुणनिधि घिमिरेका झ्याउरे छन्दमा १० पदका कविता

झ्याउरे छन्दमा १० पद
~~~~~~~~~~~~~~~~~~~~~

तिमी हिंड्ने मुलबाटोमा काँढा झर्यो कि
नरम नरम बाटो हिंड्ने बानी पर्यो कि ।
‌‌ १
शरीर हाम्रो जस्तो गर्यो उस्तै बानी हुने
सुख पाए रमाउने दु:ख पाए रुने ।
२
साना ठूला काँढाहरू पन्छाउँदै जाउँ
सुख दुःख जिन्दगी हो मिलाउँदै बिताउँ।
३
सुन्दर यो संसारमा जन्म भयो हाम्रो
मिलिजुली इष्टमित्र दिन बिताउनु राम्रो ।
४
थाहै नपाई जिन्दगीको बेला बित्न लाग्यो
पत्तै नपाई समयले नेटो काट्न लाग्यो ।
‌ ५
एउटा रथका दुईटा पाङ्ग्रा हामी दम्पती ले
यथाशक्ति कर्म गरौं आफ्नै सम्पतिले ।
‌ ६
हिुमालको चिसो हावा झरनाको पानी
सुख दुःख हाँसो रोदन रहेछ जिन्दगानी ।
‌ ७
तिर्खा लागे पानी पिउँला भोक लागे खाउँला
झ्याउरेमा ताल मिलाई मिठो गीत गाउँला ।
८
जाँदा जाँदै गोरेटोमा भत्किन्छ कि बाटो
खनिखोस्री गर्नु पर्छ आफ्नै देशको माटो ।
९
टुक्रा टाक्री बटुलेर टालटुल पारौँ हामी
आफ्नै देशका बाटा घाटा बनाउँला नामी ।
‌ ——- १० ——-

गुणनिधि घिमिरे पाँचथर मोरङ हाल अमेरिका