स्रष्टा परिचय
– नाम – रुद्र ज्ञवाली
– जन्ममिती – १ कार्तिक २०२०
– जन्मस्थान- रुरु गा पा २ गुल्मी
– मातापिताको नाम- रुक्माँगत/ टीकादेवी
– हालको स्थाइ / अस्थाई बासस्थान – सिद्धार्थनगर न. पा.-८ रुपन्देही ।
– शिक्षा- स्नातक
– पेशा- निजामती सेवाबाट निवृत
– आवद्ध साहित्यिक क्षेत्र- सिद्धार्थ साहित्य परिषद, प्र ले स, जनमत लगायत एक दर्जन जति
– पाएका सम्मान तथा पुरस्कार – सम्मान र पुरस्कार गरि दुई दर्जन ।
– लघुकथा लेख्न थालेको मिति – २०४४ देखि
– पहिलो लघुकथा- अस्तित्ववोध
– कुनै पत्रीकामा पहिलोपटक छापिएको लघुकथा पत्रीकाको नाम सहित- अस्तित्ववोध, २०४५ साल ,
मधुपर्क ।
– हालसम्म प्रकाशित कृतिहरू
निर्वासन -कथासंग्रह- २०५८
सपना फुल्ने रातहरू- गजल संग्रह- २०६१
बिबरुका कथाहरू – सहप्रकाशन- २०६६
उन्मुक्त आकाश- मुक्तक संग्रह- २०६६
असल साथी – बालकथा संग्रह- २०७२
पात्रहरू- कथा संग्रह – २०७३
रुझेर अग्निवर्षामा- मुक्तक संग्रह- २०७५
लघुकथा: नर्कवास
रूद्र ज्ञवाली
“हाम्रो हिजोको निणर्यको के प्रतिक्रिया छ त ?” धर्मराजले आफ्ना प्रमुख गुप्तचरसँग जिज्ञाशा राखे ।
“स्वर्ग पठाइएकाहरू सन्तुष्ट हुनु र नर्क पठाएकाहरू असन्तुष्ट हुनु त नियमित र स्वाभाविक प्रक्रिया थियो । तर यसपटक कहिल्यै नभएको विचित्रको घटना घट्यो महाराज । ” प्रमुख गुप्तचरले हात जोड्दै जाहेर गर्यो ।
“के भयो त्यस्तो अचम्मको कुरा ? ” धर्मराजले जिज्ञाशा राखे ।
“महाराज नर्क चलान भएका मनुवा मध्ये एकजना नर्कमा दुखित छैन । अति प्रफुल्ल भएर रमाइरहेको छ । ” गुप्तचरले पुनः जाहेर गर्यो ।
“मान्छेहरू नर्कको नाम सुन्नासाथ थर्कमान हुन्छन् । त्यो मनुवा नर्कवासमा दुखित हुनुको सट्टा कसरी खुशी हुन सक्यो ? यस वारेमा केही बुझेनौ ?? ” धर्मराजले सोधे ।
“महाराजको आदेश विना यस विषयमा सोधपुछ गरि हाल्नु मनासिव लागेन महाराज । महाराजबाट मर्जी हुन्छ भने ……. । ” गुप्तचर आदेशको प्रतीक्षामा देखियो ।
“ अँ .. त्यो रहस्यमय मनुवालाई म भेट्न चाहन्छु । त्यसलाई तुरुन्त यहाँ झिकाउ । ” धर्मराजले आदेश दिए ।
“ए ! मनुवा तँलाई नर्कमा बस्नु पर्दा पनि कुनै पश्चाताप, ग्लानी वा दुःख लागेको छैन । ” धर्मराजले आफ्नो अगाडि उभिएको मान्छेसँग प्रश्न गरे ।
“छैन महाराज छैन । यहाँको सबै व्यवस्थाबाट म एकदम सन्तुष्ट छु । सधै नै यत्तिको सुविधाको ग्यारेन्टी हुने हो भने म एक जुनी त के सयौं जुनी नर्कमा बस्न तयार छु । ” त्यो मान्छेले मुसुमुसु हाँस्दै जवाफ दियो ।
“मान्छेहरू नर्क भन्ने वित्तिकै थर्थर काँप्छन् । तर तँ भने नर्कमा रमाउँदैछस् । मेरो जीवनमा तँ जस्तो रहस्यमय मान्छे मैले कहिल्यै देखेको थिएन । यो खुशी किन त मनुवा ? ” धर्मराजले मान्छेसँग सोधे ।
“किनभने जहाँबाट म यहाँ ल्याइएँ त्यहाँको भन्दा यहाँको व्यवस्था सबै किसिमले उच्चकोटीको छ । यहाँ जे हुन्छ कम्तीमा पनि कानुन बमोजिम हुन्छ । म ल्याइएको देशमाजस्तो भनसुन र पहूँचका आधारमा हुँदैन । यहाँ विधि सर्बोच्च छ ” मान्छेले जवाफ दियो ।
“ ए !…. त्यस्तो पो … ? कहाँबाट ल्याएको रे मनुवा तँलाईं ? ” यमराजले अचम्म मान्दै सोधे ।
“ मत्र्य मण्डलको नेपाल भन्ने देशबाट , महाराज । ” मान्छेले जवाफ दियो ।
भैरहवा
