तीतोपाटी, काठमान्डौं – कोरोना भाइरसको नयाँ भेरिएन्ट ‘ओमिक्रोन’को विश्वभर चर्चा चलिरहेको छ।नेपाल सरकारले बुधबार बिज्ञप्ती मार्फत नेपालमा ओमिक्रोन हाल सम्म नदेखिए पनि सबैलाई सचेत रहन र स्वास्थ्य मापदन्ड पालन गर्न अनुरोध गरेको छ।
यता नेपालको विमानस्थलमा अफ्रिकन देशहरुबाट आउने उडानका यात्रुहरुलाई सोमबार देखी १० दिन क्वारेन्टाइन बस्न भनिएको छ तर कोभिड-१९ संकट ब्यवस्थापन समान्वय केन्द्र(सीसीएमसी)की प्रबक्ता सुनिता नेपालले भने आफूहरुलाई कुनै अधिकारिक जानकारी नआएको बताउछिन।
‘ओमिक्रोन’भेरिएन्टबाट बच्न कुन-कुन देशहरूले के-के गर्दैछन?
अष्ट्रेलिया: अष्ट्रेलियाले न्यूजील्याण्ड र सिंगापुर बाहेक सबै देशका नागरिकहरुका लागि डिसेम्बर १५ सम्म सिमाना बन्द गरेको छ। साथै अस्ट्रेलियन नागरिक र अष्ट्रेलियन पिआर भएकाहरुका लागि ७२ घण्टा भित्रको पिसीआर रिपोर्ट र घर वा होटलमा आइसोलेसनमा बस्नको लागि नयाँ नियम बनाएको छ।
जापान: जापानले सोमबारदेखी विश्वभरका सबै विदेशी आगन्तुकहरूको प्रवेशलाई रोक लगाएको छ।आगमनका सबै उडानहरु रद्द भएका छन।
संयुक्त राज्य अमेरिका: दक्षिण अफ्रिका र अन्य सात देशहरू (बोत्स्वाना, जिम्बाब्वे, नामिबिया, लेसोथो, इस्वाटिनी, मोजाम्बिक र मलावी) बाट संयुक्त राज्य अमेरिकामा यात्रा प्रतिबन्ध सोमबारदेखि लागू गरेको छ । अमेरिकी नागरिक र वैध स्थायी बासिन्दा(पिआर)हरूलाई प्रतिबन्धबाट छुट दिइने छ।
सेशेल्स: दक्षिण अफ्रिकीहरू र बोत्सवाना, इस्वाटिनी, लेसोथो, मोजाम्बिक, नामिबिया र जिम्बाब्वेका आगन्तुकहरूलाई शनिबार(डिसेम्बर ४) देखि सेशेल्समा प्रवेश निषेध गरिनेछ।
बंगलादेश: बंगलादेशले शनिबार(नोभेम्बर-२७)देखी दक्षिण अफ्रिका जाने र आउने सबै उडानहरु रद्द गरेको छ।
साउदी अरेबिया: दक्षिण अफ्रिका, नामिबिया, बोत्सवाना, जिम्बाब्वे, मोजाम्बिक, लेसोथो र इस्वाटिनी जाने र आउने उडानहरू सोमबारबाट स्थगित गरिएको छ।
कुवेतः कुवेतले गत शनिबारदेखि नै दक्षिण अफ्रिका, नामिबिया, बोत्सवाना, जिम्बाब्वे, मोजाम्बिक, लेसोथो, इस्वाटिनी, जाम्बिया र मलावीसँगको सीधा व्यावसायिक उडानहरू स्थगित गरेको घोषणा गरेको छ। ति देश हुँदै अाउने अाफ्ना नागरिकलाइ ७ दिनको क्वारेन्टिनमा राख्ने भएको छ भने विदेशी नागरिकको हकमा उपरोक्त मुलुक छोडेको १४ दिन सम्म अन्य मुलुकमा बसी अाउनेहरूलाइ कुवेत प्रवेश अनुमति दिएको छ ।
श्रीलंका: श्रीलंका सरकारले दक्षिण अफ्रिका, बोत्सवाना, जिम्बाब्वे, नामिबिया, लेसोथो र इस्वाटिनी लगायत छ वटा दक्षिणी अफ्रिकी राष्ट्रहरूबाट आउने यात्रुहरुलाई अनिवार्य क्वारेन्टाइन बस्नु पर्ने नियम लागू गरेको छ।
बेलायत: बेलायतले गत शुक्रबारदेखि दक्षिण अफ्रिका, बोत्सवाना, लेसोथो, इस्वाटिनी, जिम्बाब्वे र नामिबियाका आगमनमा यात्रा प्रतिबन्ध लगाएको छ। यि ६ देशबाट गरिने सबै उडानहरुलाई अस्थायी प्रतिबन्ध गरेको छ।
इजरायल: इजरायलले पहिले नै दक्षिण अफ्रिका र अन्य ६ अफ्रिकी देशहरूलाई आफ्नो “रातो सूची” मा समावेश गरिसकेको थियो।अब ती राष्ट्रहरूबाट स्वदेश फर्कने इजरायलीहरूले १४ दिनको क्वारेन्टाइन बस्नु पर्ने छ भने सबै बिदेशी नागरिकहरुका लागि इजरायलमा प्रबेश निशेध गरिएको छ।
इटाली: इटालीले दक्षिण अफ्रिका, लेसोथो, बोत्सवाना, जिम्बाब्वे, मोजाम्बिक, नामिबिया वा स्वाजिल्यान्डबाट प्रवेश गर्न निषेधको घोषणा गरेको छ ।
जर्मनी र स्कटल्याण्डले पनि ६ अफ्रिकी राष्ट्रहरूमा यात्रा प्रतिबन्ध गरेको छ।
फ्रान्स:फ्रान्सले दक्षिणी अफ्रिकाबाट आउने सबै उडानहरू ४८ घण्टाका लागि स्थगित गरेको छ ।
सिंगापुर: सबै सात अफ्रिकी देशहरूबाट सिंगापुर हुँदै प्रवेश वा ट्रान्जिट गर्ने यात्रालाई प्रतिबन्ध लगाएको छ।आइतबारदेखि दक्षिण अफ्रिका, बोत्सवाना, इस्वाटिनी, लेसोथो, मोजाम्बिक, नामिबिया र जिम्बाब्वेका उडानहरु स्थगित भएका छन।ती देशबाट आउने सिंगापुरका नागरिकहरूले १० दिनको क्वारेन्टाइनमा बस्नुपर्नेछ।
अन्य देशहरुले भने यात्रामा यस् अघि कै मापदन्ड र नियमहरु पालना गरेका छन।
