तितोपाटी- राष्ट्रिय फुटबल टोलीको बन्द प्रशिक्षण कतारमा गर्ने तयारी गरिएको छ । तर उक्त प्रशिक्षण भारत बिरुद्धको मैत्रीपूर्ण खेलपछि मात्रै हुनेछ ।
अखिल नेपाल फुटबल संघ(एन्फा)का अनुसार राष्ट्रिय फुटबल टोली आगामी सेप्टेम्बर १० मा दोहाका लागि प्रस्थान गर्नेछ । माल्दिभ्समा अक्टोबर एक देखि हुन लागेको दक्षिण एशियाली फुटबल(साफ) च्याम्पियनशीपको तयारी स्वरुप बन्द प्रशिक्षण कतारमा गर्न लागेको एन्फाले जनाएको छ । हाल पोखरामा बन्द प्रशिक्षणमा रहेका २५ खेलाडी कतार प्रस्थान गर्नेछ । कतारबाटै राष्ट्रिय फुटबल टोली सेप्टेम्बर २७ मा माल्दिभ्सको लागि प्रस्थान गर्नेछ । नेपालले भदौ १७ र भदौ २० मा भारत बिरुद्ध घरेलु मैदानमा मैत्रीपूर्ण फुटबल खेल्नेछ । सन् २०२२ को विश्वकप छनोट प्रतियोगिता खेलेर कुवेतबाट फर्केपछि राष्ट्रिय टोलिको बन्द प्रशिक्षण काठमाडौंमा सञ्चालन गरिएको थियो । काठमाडौंमा करिब तीन साता प्रशिक्षण सम्पन्न भएपछि टोलि पोखरा पुगेको हो । पोखरामा दुई साताको प्रशिक्षणपछि अब कतार प्रस्थान गर्ने एन्फाले जनाएको छ । गोरखापत्र अनलाइनबाट
