तीतोपाटी डटकम- बनेपा ११ सिनागाल स्थित बाँनियाटोलमा डेरा गरी बस्ने पाँचखाल नगरपालिका वडा नम्वर ६ घर भएका एक महिला र उनकै ६ बर्षिया छोरा मृत अवस्थामा फेला परेका छन् । असार ३ गते राति ११.५५ बजेको समयमा प्रहरीले उनिहरुलाई मृत अवस्थामा फेला पारेको थियो भने महिलाका श्रीमानलाई अचेत अवस्थामा फेला पारेको थियो ।
‘डेरामा औषधी र विषादी फेला परेको छ, मृतकहरुको शरिरमा कुनै चोटपटक छैन’–इलाका प्रहरी कार्यालय बनेपाका प्रहरी निरिक्षक राजन कोईरालाले भन्नुभयो–‘शरिरमा कुनै चोटपटक देखिएको छैन, तीनै जनाको शरिरमा विषादी देखिन्छ । श्रीमानलाई उपचारको क्रममा शिर मेमोरियल अस्पताल बनेपामा भर्ना गरिएको छ ।’ पाँचखाल नगरपालिका ६ घर भई बनेपाको नाला दोवाटोमा पसल गरी बस्दै आएका ३३ बर्षिय माधवप्रसाद घिमिरे, उनको श्रीमती ३० बर्षिय मनिषा कार्की घिमिरे र ६ बर्षिय छोरा युवान घिमिरेका बारेमा थप अनुसन्धान भईरहेको प्रहरीले जानकारी दिएको छ ।
श्रीमती मनिषा र छोरा युवानको घटनास्थलमै निधन भएको प्रहरीले जानकारी दिएको छ । केहि समय अघि देखि माधवप्रसाद घिमिरेले डिप्रेसनको औषधी सेवन गर्दै आएका थिए । निषेधाज्ञा तथा अन्य पारिवारीक तनावका कारण उनिहरुको परिवारमा केहि समय देखि खटपट हुँदै आएको प्रारम्भिक अनुसन्धानबाट खुलेको छ । श्रीमान माधवप्रसाद घिमिरे आफैले श्रीमती र बच्चालाई विष खुवाई आफुले खाएको हुन सक्ने शंका आफन्तले गरेका छन् । प्रहरीले अनुसन्धानका लागि आफ्नै नियन्त्रणमा उनको उपचार गराईरहेको बताएको छ ।
साभार-न्यूज अफ नेपाल-मोतीराम तिमल्सिना, काभ्रे
