तितोपाटी- कुवेतमा कोभिड -१९ को खोप लिन इच्छुक व्यक्तिहरूको संख्या दैनिकरुपमा बढ्दै गएको छ भने कोभिड भ्याक्सिन लिन चाहने हालसम्म करिब एक लाख व्यक्तिहरुले अनलाइन मार्फत आवेदन दर्ता गरेका छन्। कुवेत सरकारले कोभिड-१९ विरूद्धको खोप लिनको लागि अनलाइन मार्फत दर्ता गर्ने व्यवस्था मिलएको छ ।
कुवेतस्थित स्वास्थ्य मन्त्रालयको आधिकारिक तथ्याङ्क अनुसार ९५ हजार भन्दा बढी व्यक्तिले खोप लिनका लागि फारम भरेका छन् । त्यस्तै कुवेत सरकारले हिजो देखी निःशुल्क खोप दिन सुरु गरेको छ।
स्वास्थ्य मन्त्री बासिल अल सबाहका अनुसार भाइरस रोकथामको लागि कुवेतमा रहेका स्वदेशी तथा विदेशी सबैले कोभिड-१९ को खोप लिनु पर्ने बताएका छन।
कुवेतका प्रधानमन्त्री शेख सबाह अल खालिद अल सबाह र स्वास्थ्य मन्त्री डा.बासिल अल सबाहले पहिलो खोप लगाउदै कोभिड-१९ विरूद्धको खोप कार्यक्रमको उद्घाटन गरेका थिए । प्रधानमन्त्रीले कोभिड विरूद्धको खोप लिँदा कुनै साइड इफेक्ट नहुने बताउदै कुवेतबासी सबैलाई खोप लिन अनुरोध गरेका छन् ।
