तितोपाटी- साउदी सरकारले हालै मात्र थप ५८ जना अवैधानिक नेपाली कामदारहरूलाई बहिर्गमन भिसा (एक्जिट भिसा) को अवसर दिएको छ । यससँगै अवैधानिक कामदारलाइ बहिर्गमन भिसा दिने प्रकृयाको थालनी भएयता हालसम्म १ हजार ४०६ जना अवैधानिक नेपाली कामदारहरुलाई बहिर्गमन भिसा जारी गरिसकेको जनाइएकाे छ ।
साउदीस्थित नेपाली दूतावासका अनुसार परिचयपत्र (अकामा) जारी नगरी, नवीकरण नगरी वा कम्पनी छोडी भागेर काम गरिरहेका अवैधानिक नेपाली कामदारका लागि त्यहाँकाे सरकारले यस्ताे अवसर दिएकाे हाे । यसरी अवैधानिक भएकाहरू बहिर्गमन भिसा नहुँदा घर फर्कन नपाउने र पक्राउ पर्ने जाेखिम रहन्छ । उनीहरूकाे विवरण लिएर दूतावासले बहिर्गमन भिसाका लागि साउदी सरकारलाई अनुरोध गरेपछि उक्त व्यवस्था गरिएकाे जनाइएकाे छ ।
दूतावासले अझै ठूलो सङ्ख्यामा बहिर्गमन भिसाका लागि निवेदन पारेको समेत जनाएकाे छ । उनीहरूकाे सूची पनि साउदी सरकारलाई बुझाएको र भिसा लाग्नसाथ नामावली प्रकाशन गरिने दूतावासकाे भनाइ छ । साथै दूतावासले हालसम्म बहिर्गमन भिसा लागेकाहरूले भने स्वदेश फर्कने तयारी गर्न अनुरोध समेत गरेको छ ।
साउदीको श्रम तथा सामाजिक विकास मन्त्रालयले १ महिनाभन्दा बढी अवधि अकामा नवीकरण नभएका, नयाँको हकमा ४ महिनाभन्दा बढी अवधि अकामा जारी नभएकाहरू तथा कम्पनी छोडी भागेर कालोसूचीमा परेका भए पनि कुनै पनि मुद्दा मामिला, दण्ड, जरिवानामा नपरेका कामदारका लागि बहिर्गमन भिसा जारी गर्ने व्यवस्था गरिएकाे थियाे ।
साभार न्युज२४नेपालबाट
