Monday 26th October 2020

नेकपा एमालेलाई नेकपासँग मिल्दोजुल्दो चुनाव चिह्न


किरण दाहाल-  निर्वाचन आयोगले सत्तारुढ दल नेकपाको चुनावी चिह्नसँग मेल खाने गरी नयाँ राजनीतिक दललाई पनि चुनाव चिह्न प्रदान गरेको छ । सत्तारुढ दल नेकपा र बुधबार आयोगबाट दलको प्रमाणपत्र पाएको नेकपा एमाले दुवैको चुनाव चिह्न सूर्य भएको छ । नेकपाको चुनाव चिह्न सूर्य र नेकपा एमालेको उदाउँदै गरेको सूर्य भएको छ ।

तर, निर्वाचन आयोगले दुवै दलको चिह्न सूर्य भए पनि फरक रहेको दाबी गरेको छ । दुवै दलको चुनाव चिह्न सूर्य कसरी हुन्छ ? आयोग प्रवक्ता राजकुमार श्रेष्ठले भने, ‘नेकपा र अहिलेको नेकपा एमालेको चिह्न सूर्य नै भए पनि फरक छ । अहिले प्रयोग भइरहेको सूर्यचाहिँ सूर्य चिह्न मात्रै छ । अहिले नेकपा एमालेले प्रस्ताव गरेकोमा चाहिँ दुई डाँडाको बीचमा उदाउँदै गरेको सूर्य छ ।’ प्रवक्ता श्रेष्ठले भने, ‘यसअघि पनि आयोगले गाई र गोरु चिह्न, रोलर र डोजर चिह्न पनि दिएको छ । आयोगले त्यसलाई फरक नै मानेको छ ।’

नेकपा एमालेका महासचिव मनीषकुमार उपाध्यायले जिन्दगीमा कहिल्यै नअस्ताउने पार्टीको रूपमा आफूहरूले उदाउँदै गरेको सूर्यलाई चिह्नको रूपमा लिएको बताए । ‘उदाइसकेको सूर्य कस्तो हुन्छ सबैले देखिसकेका छौँ, अस्ताएजस्तै भएको छ । अब हामी मदन भण्डारीको पथमा लाग्ने हो । जिन्दगीमा पनि नअस्ताउने भनेर हामीले उदाउँदै गरेको सूर्य चिह्न लिएका हौँ । उदाउँदै गरेको छ, जिन्दगी अस्ताउँदैन भनेको हो ।’

निर्वाचन आयोगको बुधबार बसेको बैठकले नेकपा एमालेलाई सबै कागजात हेरेर प्रमाणपत्र दिने निर्णय गरेको थियो । आयोगका प्रवक्ता श्रेष्ठले भने, ‘बुधबार बैठक बसेर हामीले प्रमाणपत्र दिने निर्णय गरेका थियौँ । उहाँहरूले पेस गरेको कागजपत्र अध्ययन गरेर प्रमाणपत्र दिएका छौँ ।’

आयोगले दिएको प्रमाणपत्रअनुसार उक्त दलको दर्ता नम्बर १६० रहेको छ । पार्टीको पूरा नाम नेपाल कम्युनिस्ट पार्टी (एकीकृत माक्र्सवादी–लेनिनवादी) रहेको छ । नाममा कतै पनि कमा, फुलिस्टप राखिएको छैन । राजनीतिक दलको केन्द्रीय कार्यालय कामनपा–१० काठमाडौंमा रहने बताइएको छ ।

नेकपा एमालेका महासचिव उपाध्यायले आयोगले निर्णय गरेपछि आठ–दशजना पदाधिकारी पुगेर प्रमाणपत्र लिएको बताए । उनले नयाँ पत्रिकासँग भने, ‘हामीले प्रमाणपत्र लियौँ, अब पार्टीका क्रियाकलाप अघि बढाउँछौँ ।’

पूर्वएमाले नेताहरूसँग निकट व्यक्तिहरूले निर्वाचन आयोगमा नेकपा एमाले दर्ता गरेका थिए । नेकपा एमालेमा २१ जना पदाधिकारी रहेका छन् । विराटनगर–६ मोरङ घर भएकी सन्ध्या तिवारी पार्टीको अध्यक्ष छिन् । त्यस्तै, भगवती खड्का उपाध्यक्ष, मनीषकुमार उपाध्याय महासचिव, अस्मिता सुनार सचिवलगायत पदाधिकारी रहेका छन् ।

नेकपा एमाले र माओवादी पार्टी एकता भएको वर्ष दिन नाघिसकेकाले नेकपा एमालेनामक दल दर्ताका लागि बाटो खुलेको थियो । ‘पार्टीको नाम नदोहोरियोस् र कुनै पार्टीको एउटा नाम लिइसकेपछि त्यो नाम अरूले प्रयोग नगरोस् भन्नका लागि एक वर्षको म्याद राखिन्छ । तर, दुई पार्टी एकता भएको एक वर्षपछि नाम भने प्रयोग गर्न सक्छन्,’ आयोग प्रवक्ताले भने । दुई वर्षअघि नेकपा गठन भएसँगै नेकपा एमाले र माओवादी पार्टी भंग भएका थिए ।

पूर्वएमाले नेताहरूसँग निकट व्यक्तिहरूले निर्वाचन आयोगमा नेकपा एमाले दर्ता गरेका थिए । मदन भण्डारीको जन्मदिन पारेर उनीहरूले १४ असारमा दल दर्ताको निवेदन दिएका थिए । त्यसपछि यो विषय १६ असारको नेकपाको स्थायी कमिटी बैठकमा ठूलो मुद्दा बनेको थियो ।

उपाध्यक्ष वामदेव गौतमले प्रधानमन्त्री केपी शर्मा ओलीकै निर्देशनमा नेकपा एमाले दर्ताका लागि निवेदन आएको ठोकुवा गरेका थिए । उनको भनाइ थियो, ‘नेकपा एमाले दर्तामा केपी शर्मा ओलीको हात छ । मसँग प्रमाण छ, सूचना छ, यदि छानबिन भयो भने म उनीहरूलाई बयान दिन तयार छु ।’ नेकपा एमाले दल दर्ताको निवेदन आयोग पुगेपछि एउटा समूहले ओलीले पार्टी विभाजन गर्ने रणनीतिअनुसार नयाँ दल दर्ता गराउन लगाएको आरोप लागेको थियो ।

……

दल दर्ताको प्रमाणपत्र बुझेपछि नेकपा एमालेका महासचिव मनीषकुमार उपाध्यायले भने– जबज हाम्रो सिद्धान्त, हामी मदन भण्डारीका उत्तराधिकारी

तपाईंहरूले दलको प्रमाणपत्र पनि लिनुभयो, अबको योजना के छ ?

हामीले दलको प्रमाणपत्र लियौँ, त्यो नै ठूलो कुरा भयो । एउटा दल भनेर आयौँ । दलको क्रियाकलाप अघि बढाउन अहिले समस्या छ, संसारभर कोभिड महामारी छ । सामाजिक सञ्जालबाट मात्रै सम्पर्क र सम्बन्ध अघि बढाउनुपर्नेछ । आज पनि हामी पार्टीका सबै केन्द्रीय सदस्य आयोग गएनौँ । प्रमाणपत्र लिन ८–१० जना मात्र पुग्यौँ । अब बिस्तारै संक्रमणलाई पनि ध्यानमा राखेर, आफू पनि बचौँ र अरूलाई पनि बचाऔँ भन्दै पार्टीका क्रियाकलाप अघि बढाउँछौँ । अहिले त हामी सोसल मिडियामा एक–अर्काको सम्पर्कमा बसेर नै पार्टी क्रियाकलाप अघि बढाउँछौँ । सातवटै प्रदेशमा पार्टी कमिटी गठन गरिसकेका छौँ । सबै कमिटीमार्फत सबैसँग सम्पर्क गर्दै अघि बढ्छौँ ।

दल दर्ता गर्नुभयो जनताले पत्याउँछन्, केही गर्न सकिन्छ भनेर हो कि रहरले ? 

जनताको विश्वास जित्ने आधार छन् । सबैभन्दा पहिला त नेकपा एमाले पार्टी ठूलो पार्टी र लोकप्रिय पार्टी हो । आज बाउको मुख हेर्ने दिनमा प्रमाणपत्र लियौँ । त्योभन्दा अघि मदन भण्डारीको जन्मोत्सवको दिन पार्टी दर्ता ग¥यौँ । गाँस, वास र कपासले मात्रै नागरिकलाई पुग्दैन । उसको भविष्य सुनिश्चित हुनुप¥यो । कृषकले आफ्नो कामको मुआब्जा लिनुप¥यो । शोषण भएपछि देश चल्दैन । शोषणलाई हटाएर, दलाली प्रथालाई हटाएर अघि बढ्नुपर्छ । शिक्षा, रोजगार, स्वास्थ्यलगायतका चिजलाई ध्यान दिनुप¥यो । सीपको, पसिनाको मूल्य पाउनुप¥यो । यी मुद्दा मूल आधार छन् । यी आधार बोक्छौँ । हामी युवा छौँ, गफभन्दा काम बढी गर्छौँ ।

यी मुद्दा उठाउने अरू पार्टी पनि छन्, तपाईंहरूलाई नयाँ पार्टी नै किन चाहियो ? 

हामी मदन भण्डारीको जबजलाई बोक्छौँ । उहाँको एक–एक बुँदा जनताले मन पराएका थिए । हामी उहाँको आशीर्वाद, एक–एक बुँदालाई लिएर अघि बढ्नेछौँ । अब हामी नै हो मदनको उत्तराधिकारी । हामी राम्रो खाका लिएर जनतासमक्ष जानेछौँ । उहाँहरूले कुरा बुझ्नुहुन्छ । जनताको भविष्य सुनिश्चित हुनुप¥यो । गाँस, वास, कपास हुनुप¥यो । उद्योगधन्दा चल्नुप¥यो । विदेशी चिज लिएर, ब्रान्डेड चिज भनेर लगाएर होइन कि नेपालको उद्योगलाई अघि बढाउनुप¥यो ।

तपाईंहरूले जबज भनिरहनुभएको छ । यही विचारधारा बोकेर एउटा पार्टीले लामो समय राजनीति ग¥यो । अहिले सत्तारुढ दलको एक खेमाले जबजलाई अघि सारेको छ । अब जबज उहाँहरूले अंगीकार गर्नुहुन्न भन्ने निष्कर्ष हो ?

त्यही नै हो, सबैले देखिरहेकै छौँ । उहाँहरूले जबजको नाम मात्रै लिनुभयो, तर जबजको ‘ज’ पनि छोएर हिँड्नुभएको छैन । उहाँहरूले नाम मात्रै लिनुभयो, काम गर्नुभएन । अब नाम जनताले लिन्छन्, काम हामी गर्छौँ ।

तर, तपार्ईंहरूलाई नेकपाको एउटा खेमाले नै नयाँ पार्टी खोल्न सहयोग गरेको आरोप छ नि ? 

कागले कान लग्यो भन्दैमा कागको पछि लाग्नु गलत हो भन्ने एउटा उखान छ । उहाँ नेताज्यूहरूलाई आफूले छोडेको पार्टी अरूले लियो भनेपछि उहाँहरूको खेमामा नै जोड–बिजोड हुनु त उहाँहरूको गल्ती हो । वनको बाघले खाओस्–नखाओस्, मनको बाघले खायो भन्ने उखान नै छ । हामी कसैको पथप्रदर्शकमा लागेको होइन । हामी पहिलादेखि नै नेकपा एमालेभन्दा पनि जबजबाट प्रेरित भएका हौँ । उहाँले गर्न खोजेको चिज गर्न उहाँले सक्नुभएन, हामी उहाँको हरेक चिज लिएर अघि बढ्छौँ ।

अरू दलसँग एकता गरेरै अघि बढ्नेबारे पार्टीमा के सल्लाह भएको छ ?

एकता गर्नेबारे अहिले छलफल छैन । व्यावसायिक मर्ज राम्रो हुन्छ, राजनीतिक मर्ज कस्तो हुन्छ भन्ने त हामीले देखिरहेकै छौँ । मर्ज गरेर हिँड्ने हाम्रो पार्टीको सिद्धान्त नै छैन । बरु जो आउँछ हामी स्वागत गर्छौँ । उहाँहरूलाई स्थान दिन्छौँ । हामी अहिले कुनै पनि हालतमा एकता गर्दैनौँ, कुनै पनि अवस्थामा गर्दैनौँ ।

संगठन विस्तारको योजना के छ ?

महामारीका कारण अहिले घुमफिर गर्न सक्दैनौँ । ७ प्रदेश कमिटीसँग समन्वय गरेर संगठन विस्तार गर्छौँ । उहाँहरूलाई नै अघि बढाउँछौँ हामी । र, जति पनि नेकपा एमालेलाई मन पराउने थिए, माथिल्लो स्तरले मन पराए पनि तल्लो स्तरले त मन पराएका थिएनन् होला, हामी उहाँहरूलाई पे्ररित गरेर अघि बढ्छौँ । हामी जनताबाट कुरा लिन्छौँ । हामी जनतालाई सल्लाहकार नियुक्ति गर्छौँ । उहाँहरूको सल्लाहले हामी अघि बढ्छौँ । हामी पुलका रूपमा मात्रै बस्छौँ, मुख्य त नागरिक नै हुन् । नागरिकको एक–एक चाहनालाई आँखामा राखेर अघि बढ्छौँ ।

आगामी निर्वाचनमा भाग लिनुहुन्छ ?

निर्वाचनमा भाग लिन्छौँ । पार्टी दर्ता मात्रै ग¥यो भने कसैले उक्साएर गरेको हो कि भन्ने शंका हुन्छ । कुनै पार्टीका अध्यक्ष वा कसैले गर्न लगायो भन्ने शंका हुन्छ, त्यसलाई हटाउनका लागि भए पनि हामी मैदानमा आउँछौँ । भोट त जनताले दिने हुन् ।

-नयाँपत्रिका दैनिकबाट


Loading...
सम्बन्धित शीर्षकहरु

हिमालकी छोरी बनी जन्मिएकी शैलपुत्री । सबै शक्ति संभावना बोकिकन मनैभरी । आरधना गरेदेखि मनकामना पूर्ण हुने । धनधान्य, आरोज्ञसाथ…

सत्तारूढ नेपाल कम्युनिस्ट पार्टीका कार्यकारी अध्यक्ष पुष्पकमल दाहाल ‘प्रचण्ड’ले पर्सामा पार्टीका कार्यकर्ता हत्या गर्ने जोसुकै भए पनि तुरुन्त कारबाही गर्न…

दुर्गापक्षको मुख्य दिन सोमबार विजयादशमी मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका एवं समृद्धिको प्रतीक जमरा लगाएर…

प्रतिकृयाहरू