तितोपाटी – जाजरकोट जिल्लाको भेरी नगरपलिका-२ तिमिलेमा गएरातीको अबिरल बर्षाका कारण माथिबाट पहिरो अाइ घर भत्किँदा एकै परिवारका ३ जनाको मृत्यु भएको छ । पहिरो खसेर स्थानीय बलबहादुर ओलीको घर पहिरोले पुरिँदा उनका श्रीमतीसहित दुई छोरीको मृत्यु भएको हो । पहिरोमा परी ३२ बर्षीया पार्वती ओली, ९ वर्षीया छोरी मोतिकला ओली र ३ वर्षीया छोरी धनसराको मृत्यु भएको जाजरकोटका प्रहरी प्रमुख डिएसपी श्यामबहादुर खत्रीले जानकारी दिए ।
राती सुतिरहेको अबस्थामा मध्यरातमा पहिरोले घर भत्किएको उनले बताए। सोही स्थानमा अर्को घर भत्किँदा स्थानीय दलबहादुर ओली सामन्य घाइते भएको प्रहरीले जनाएको छ । पहिरोले घर पुरिएर मृत्यु भएकालाई स्थानीय र प्रहरीले बाहिर निकाल्ने काम गरिरहेको र अन्य अबस्था र उद्धारको कार्यका लागि जिल्ला प्रहरी कार्यालयको एक टोली घटनास्थलतर्फ गैसकेको प्रहरी प्रमुख खत्रीले बताए । घटनास्थल सदरमुकाम खलंगादेखि ३ घन्टाको पैदल दुरीमा रहेको छ। पहिरोको अन्य क्षतिबारे थप जानकारी आइसकेको छैन ।
-नागरिकन्यूजबाट
