तितोपाटी – भारतीय विदेशमन्त्री एस जयशंकर भदौ ४ मा नेपाल जाने भएका छन् । नरेन्द्र मोदी सरकारको दोस्रो कार्यकाल सुरु भएयता भारतीय पक्षको यो पहिलो उच्चस्तरीय नेपाल भ्रमण हुनेछ । विदेशमन्त्री जयशंकर नेपाल–भारत मन्त्रीस्तरीय संयुक्त संयन्त्रको पाँचौं बैठकका लागि नेपाल जान लागेका हुन् ।
‘विभिन्न विषयमा छलफलका लागि हाम्रो तयारी छ, त्यसको गृहकार्य हुँदै छ,’ पराराष्ट्र मन्त्रालयका सचिव शंकर वैरागीले भने । बैठकमा दुई मुलुकबीचका सबै द्विपक्षीय विषयमा छलफल हुनेछन् ।परराष्ट्रमन्त्री प्रदीप ज्ञवाली र जयशंकरबीच हुने बैठकमा भारतको सहयोगमा सञ्चालित परियोजनाहरूको समीक्षा, नेपाल–भारत प्रबुद्ध समूह (ईपीजी) प्रतिवेदन, भारतीय डुबान समस्या, पञ्चेश्वर र सीमा विवादलगायत छलफलका विषय रहनेछन् । नेपाल–भारतबीचका द्विपक्षीय मुद्दाहरूको छलफलका लागि मन्त्रीस्तरीय संयुक्त संयन्त्र नै उच्चस्तरीय मञ्च हो । उक्त संयन्त्रको पछिल्लो बैठक तीन वर्षअघि भएको थियो ।
दुई दिनको बसाइका क्रममा जयशंकरले राष्ट्रपति विद्यादेवी भण्डारी र प्रधानमन्त्री केपी शर्मा ओलीलगायतसँग भेटघाटसमेत गर्नेछन् । उक्त भेटघाटमा भारतको सहयोगमा निर्माण सम्पन्न भइसकेका र हुने चरणमा रहेका परियोजनाहरूमाथि पनि छलफल हुनेछन् । मोतीहारी–अमलेखगन्ज पाइपलाइन, हुलाकी राजमार्गअन्तर्गका दुईवटा सडक खण्ड र विराटनगरस्थित एकीकृत भन्सार जाँच चौकी (आईसीपी) सम्पन्न भइसकेका छन् ।
साथै जयनगर–कुर्था रेल परियोजना पनि अन्तिम चरणमा छ । सम्पन्न भइसकेका परियोजनाहरूको दुवै देशका प्रधानमन्त्री तहबाट ‘रिमोट’ उद्घाटन गराउने विषयमा समेत छलफल हुने स्रोतले बताएको छ । त्यसैगरी जयशंकरको नेपाल बसाइका बेला उच्च राजनीतिक भ्रमणको विषयले पनि प्राथमिकता पाउने बताइएको छ । ‘भारतीय राष्ट्रपति रामनाथ कोविन्द वा प्रधानमन्त्री नरेन्द्र मोदीमध्ये जो भए पनि एक जनाको भ्रमण चाँडो गराउन विषयमा पनि छलफल हुनेछ,’ स्रोतले भन्यो । परराष्ट्रका स्रोतका अनुसार नेपाली पक्षले भारतीय राष्ट्रपतिको भ्रमण नभएको लामो समय भइसकेकाले राष्ट्रपति कोविन्दको प्राथमिकतामा छ ।
