काठमाडौँ– नेपाल कम्युनिष्ट पार्टी (नेकपा)ले आइतबार ७७ जिल्लाका इन्चार्ज र अधिकांश सह–इन्चार्जको टुङ्गो लगाएको छ । लामो गृहकार्य र दुई अध्यक्ष केपी शर्मा ओली र प्रचण्डबीचको सहमतिपछि आइतबार सचिवालय बैठक बसेर अनुमोदन गरेका जिल्ला इन्चार्ज र सह–इन्चार्ज चयन गर्दा कतै खातैखात त कतै पुरपुरोमा हात जस्तै भएको छ । 
७७ मध्ये कतिपय जिल्लामा इन्चार्ज मात्रै तोकिएको छ भने कतिपय जिल्लामा इन्चार्जसहित १० जनासम्म सह–इन्चार्ज तोकिएका छन् ।
कतिपय जिल्लामा असन्तुष्टि देखिएकाले इन्चार्ज मात्रै तोकिएको नेकपा स्रोतले जनाएको छ । तर यो असन्तुष्टि भएपनि नेताहरुले व्यक्त गर्न चाहेका छैनन् ।
ताप्लेजुङ लगायत १२ वटा जिल्लामा नेकपाले सह–इन्चार्ज तोकेको छैन । सह–इन्चार्ज नतोकेका जिल्लाहरुमा इलाम, धनकुटा, ओखलढुङ्गा, सप्तरी, नुवाकोट, मनाङ, पर्वत, म्यादी, मुस्ताङ, नवलपरासी पश्चिम, गुल्मी, र प्युठान रहेका छन् । त्यस्तै महानगरहरुमा पनि नेकपाले सहइन्चार्ज तोकेको छैन ।
तर कतिपय जिल्लाहरुमा नेकपाले १० जनासम्म सहइन्चार्ज तोकेको छ । नेकपाका सह–इन्चार्ज धेरै भएका जिल्लाहरुमा धनुषा, काठमाडौ र सिराहा रहेका छन् । सिराहमा १० जनालाई सह–इन्चार्ज तोकिएको छ भने धनुषा र काठमाडौँमा ९–९ जना सह–इन्चार्ज तोकिएका छन् ।
-रातोपाटीबाट
