तितोपाटी- परराष्ट्र मन्त्रालयको राहदानी विभागले मेसिन रिडेबल राहदान (एमआरपी)को प्रतिलिपि लिनका लागि प्रमाणित काजगपत्र आवश्यक नपर्ने जनाएको छ ।
राहदानी विभागले सूचना जारी गरेर एमआरपीको प्रतिलिपि लिन नागरिकता वा नाबालक परिचयपत्रको विवरण प्रमाणित गराइ ल्याउन नपर्ने जनाएको हो ।
‘जिल्ला प्रशासन कार्यालय र ईलाका प्रशासन कार्यालयहरूबाट आफ्नो नागरिकता वा नाबालक परिचयपत्रको विवरण प्रमाणित गराइ एक पटक मेसिन रिडेबल राहदानी लिएका तर त्यस्तो राहदानी हराएको, मसी पोखिएको, पाना च्यातिएको वा पाना सकिएर पुनः राहदानी बनाउनुपर्ने सेवाग्राहीहरूमध्ये कतिपयले पुनः जिल्ला प्रशासन, ईलाका प्रशासन कार्यालयबाट नागरिकता वा नावालक परिचयपत्र प्रमाणित गराई ल्याउने गरेको पाइएको छ’, सूचनामा भनिएको छ, ‘एक पटक नेपालभित्र राहदानी लिइसकेका सेवाग्राहीहरूको विवरण विभागको सिस्टममा रहने भएकोले पुनः राहदानी बनाउनु परेमा त्यस्तो प्रमाणीकरण आवश्यक पर्ने छैन ।’
पहिलो पटक विदेशस्थित नेपाली नियोगबाट एमआरपी लिएकाहरूको हकमा नेपालआई पुनः राहदानी नवीकरण गर्न वा नयाँ राहदानीको लागि आवेदन पेश गर्नुपरेमा भने सेवाग्राहीले आफ्नो नागरिकता वा नाबालक परिचयपत्रको आधिकारिता अनिवार्य रुपमा पेश गर्नुपर्नेछ ।
राहदानी विभागको नयाँ व्यवस्थाले एमआरपीको प्रतिलिपि लिन सेवाग्राहीलाई सजिलो भएको छ ।
