तितोपाटी-विपरित दिशाबाट अाएका २ मोटरसाइकल एक-अापसमा ठोक्किंदा १ जनको मृत्यु भएको छ । झापाको कमल गाउँपालिका स्थित गेउरीयामा दुई मोटरसाइकल एक–आपसमा ठोक्किँदा एकजनाको मृत्यू भएको हो भने अरू दुईजना घाइते भएका छन्।
आइतबार राती कमल गाउँपालिका ६ स्थित भित्री सडक खण्डमा पाडाजुगीबाट दक्षिणतर्फ जाँदै गरेको मे १० प ६८५१ नम्बरको मोटरसाइकल र बिपरित दिशाबाट आउँदै गरेको मे ४ प १६५८ नम्बरको मोटरसाइकल एक आपसमा ठोक्किएको थियो।
दुर्घटनामा घाइते भएका मे ४ प १६५८ नम्बरको मोटरसाइकल चालक कमल गाउँपालिका ६ का २१ वर्षिय प्रवीण राजवंशीको उपचारका लागि दमक स्थित लाईलाईन अस्पताल लैजाने क्रममा बाटोमा नै मृत्यू भएको जिल्ला प्रहरी कार्यालय झापाले जनाएको छ।
सोही मोटरसाइकलमा पछाडि बसेका मनोज शाह र मे १० प ६८५१ नम्बरको मोटरसाइकल चालक कमल गाउँपालिका ४ को लोकेश ठटाल घाइते भएका छन्। घाइते दुवैको दमक स्थित लाईलाईन अस्पतालमा उपचार भइरहेको र दुवै सवारी साधन प्रहरीको नियन्त्रणमा रहेको जिल्ला प्रहरी कार्यालय झापाका प्रहरी प्रवक्ता महेन्द्र कुमार श्रेष्ठले बताए।
