तितोपाटी – दुई गोलले पछि परेको बेल्जियमले उत्कृष्ट पुनरागमन गर्दै जापानलाई ३–२ गोल अन्तरले हराएको छ र विश्वकप फुटबलको क्वार्टरफाइनलमा स्थान बनाएको छ ।
प्रशिक्षक रोबर्टो मार्टिनेजले फेलिनी र नासेर चाड्ली सब्सिच्युडका रुपमा ६५ औं मिनेटमा मैदान प्रवेश गर्दा जापानले दुई गोलको अग्रता लिएको थियो । तर, उत्कृष्ट पुनरागमन गरेको बेल्जियमका फेलिनीले बराबरी गोल गर्दा चाड्लीले इन्जुरी टाइममा गोल गर्दै टिमलाई जित दिलाएका छन् ।
अब उसले सेमिफाइनल प्रवेशका लागि ब्राजिलसँग खेल्नेछ ।
रोस्तोभमा भएको खेलमा जापानले दोस्रो हाफको सुरुमा नै गोल गरेको थियो । खेलको ४८ औं मिनेटमा जेन्की हारागुचीको गोलबाट अग्रता लिएको जापानका ताकासी इनवीले चार मिनेटपछि नै गोल गरेपछि विश्वकपमा अर्को रोमाञ्चक जित हात पार्ने अनुमान गरिएको थियो ।
गोल्डेन जेनेरेशन भनिएको बेल्जियमका दुई स्टार लुकाकु र हजार्डको प्रदर्शन सन्तोषजनक थिएन । तर, प्रशिक्षक रोबर्ट मार्टिनेजले फेलिनी र चाड्लीलाई मैदान प्रवेश गराएपछि खेलको अवस्था फेरियो ।
जान भेर्टोनगेनले ६९ औं मिनेटमा बेल्जियमका लागि पहिलो गोल गरे । त्यसको पाँच मिनेटपछि नै इडेन हजार्डको पासमा फेलिनीले बराबरी गोल गरेका हुन् ।
निर्धारित ९० मिनेटको खेल सकिएपछि दिइएको इन्जुरी टाइम सकिनै लाग्दै चोड्लीले थोमस मुनिरको पासमा गोल गर्दै विश्वकपमा अर्को अप्रत्यासित हारको शिकार हुनबाट बेल्जियमलाई जोगाएका छन् ।
