तितोपाटी – एसिया क्षेत्रको यु–१९ विश्वकप छनोट प्रतियोगिताको अन्तिम खेलमा कुवेतलाई ८ विकेटले हराए पनि नेपाल विश्वकपमा पुग्न असफल भएको छ । आज भएको खेलमा संयुक्त अरब इमिरेट्स (युएई)ले ओमानलाई १० विकेटले पराजित गरेपछि नेपालको विश्वकप खेल्ने सपनामा पूर्णविराम लागेको हो ।
मलेसियाको राजधानी क्वालालम्पुरमा आज सम्पन्न खेलमा कुवेतले दिएको १५८ रनको लक्ष्य नेपालले २८ ओभरमा २ विकेट गुमाएर पुरा ग-यो । नेपाललाई जित दिलाउने क्रममा ओपनर रित गौतमले सर्वाधिक ६२ रनको पारी खेले भने पवन सर्राफले ५३ रन बनाए । आशिफ शेख ३३ रन र सन्दिप जोरा ५ रनमा अविजित रहे ।
यसअघि पहिले ब्याटिङ गरेको कुवेतले नोमन बुद्रोको ७० रनको मद्धतमा ४९ ओभर ४ बलमा सबै विकेट गुमाउँदै १५७ रन जोडेको थियो । कुवेतका लागि गोकुल कुमारको ३६ रन पनि महत्वपूर्ण रहयो । नेपालका कप्तान रोहित पौडेलले ३ तथा रसिद खान, सुर्य तामाङ र कुशल मल्लले २–२ विकेट लिए ।
नेपालले यसअघि सिंगापुर, ओमान र मलेसीयालाई हराएको थियो । तर युएइसँग पानी परेपछि अवरुद्ध भएको खेलमा डकवर्थ लेविस नियमका आधारमा १ रनले पराजित हुँदै अंक गुमाएको थियो । आफ्नो पाँचै खेलमा अंक बटुल्न सफल युएई सन् २०२० मा दक्षिण अफ्रिकामा हुने यु–१९ विश्वकपमा छनोट भएको छ ।
नेपालले पहिलो खेलमा सिङ्गापुरलाई २१७ रनको भारी अन्तरले पराजित गरेको थियो भने मलेसियालाई आठ तथा ओमनलाई १५० रनले पराजित गरेको थियो । जारी खेलमा नेपालले कुवेतलाई पराजित गरे पनि नेपाल विश्वकपमा सहभागिता जनाउन पाउने छैन । विश्वकपमा छनोट हुन नेपाललाई कुवेतविरुद्ध जित र ओमानले युएइलाइ हराउनु पर्दथ्यो तर युएईको जितसँगै नेपालको विश्वकप खेल्ने सपना समाप्त भएको हो ।
उक्त छनोट प्रतियोगिताको शीर्ष एक टोलीले मात्र विश्वकपमा स्थान बनाउने प्रावधान छ । जसमा युएई प्रवेश गर्न सफल भयो । यसअघि सातपटक विश्वकप खेलिसकेको नेपाल आठौँ पटक प्रवेशका लागि युएईसँगको खेल घातक सावित भयो । जितसँगै युएईले अब सन् २०२० मा दक्षिण अफ्रिकामा आयोजना हुने विश्वकपमा सहभागिता जनाउनेछ ।
