केही झिल्का कविताहरू

केही झिल्का कविताहरू
१.
लेखौँ झिल्का कविता
भावलहर बगेर जावस्
बनोस् दिव्य सरिता ।
२.
भावगङ्गामा नुहाउन जाऊँ
मनका फोहर दुर्गन्धहरू
सबै पखालेर आऊँ ।
३
डुब्नु गहिराइको भित्र
हुँदैन किनारामा केही
भित्रै देखिन्छ चित्रविचित्र ।
४.
जिन्दगीमा आइपरेका चोटहरू
संवेगका ज्वालाहरू निभाएर
मुस्कुराइरहेछन् ती ओठहरू ।
५.
उत्तेजनाका यादहरूको मातले
सम्झनामा युवावस्थाको झझल्को
बेअसर वृद्धावस्थाको शुरुआतले ।
६.
बग्दैरहन्छु भावनाका लहरहरूमा
लेकवेँसी उकाली ओरालीहरू
हराइरहन्छु कल्पनाका सहरहरूमा ।
७.
यथार्थ सकारात्मक देखौँ
भावी पिँढीहरूको नजरमा
सन्देशमूलक सत्यता लेखौँ ।
८.
सक्छौ समस्या देख
समाधान पनि देखाइदेऊ
सत्यताको पङ्क्ति लेख ।
९.
गर्छौ विरोध मात्र
यसरी कहिल्यै पनि
होइन्न असल पात्र ।
१०.
सक्छौ गर सत्कर्म
अपराध नगर कहिल्यै
कम्तिमा थाम्नु स्वधर्म ।

वि.सं.२०८१ फागुन ३ गते शनिबार

गुणनिधि घिमिरे
पाँचथर खान्द्रोङ्ग
हालः- अमेरिका