एसिया कप क्रिकेट प्रतियोगिताको फाइनल खेल आज श्रीलङ्काको राजधानी कोलम्बोमा खेलिँदै छ । १६औँ संस्करणको उपाधिका लागि भारत र श्रीलङ्काबीच भिडन्त हुँदै छ । फाइनल खेल स्थानीय समयअनुसार, दिउँसो ३ः०० बजे सुरु हुनेछ । ‘सुपर फोर’ चरणको तालिकामा भारत पहिलो र श्रीलङ्का दोस्रो हुँदै फाइनलमा पुगेका हुन् ।
भारत आठौँ पटक उपाधि जित्ने धुनमा छ भने श्रीलङ्का पनि सातौँ उपाधि हात पार्ने अभियानमा छ । जारी प्रतियोगितामा दुवै टोलीको प्रदर्शन उत्कृष्ट देखिएको छ । हालसम्म भारतले एक खेलमा मात्र हार भोगेको छ । ‘सुपर फोर’ चरणको अन्तिम खेलमा बङ्गलादेशले भारतलाई ६ रनले हराएको थियो ।
यसैगरी श्रीलङ्काले पनि जारी प्रतियोगितामा एक खेलमात्र हारेको छ । ‘सुपर फोर’ चरणको खेलमा भारतले नै श्रीलङ्कालाई ४१ रनले हराएको थियो ।
