तितोपाटी- इरानको सेनाले भुलवश युक्रेनी विमानलाई खसालिएको स्वीकार गरेको छ। इरानको सरकारी टेलिभिजनकाे एक रिपोर्ट अनुसार सेनाले युक्रेनी विमानलाई ‘गल्तीले’ खसालेकाे बताएकाे हाे।
शनिवार प्रकाशित विज्ञप्तिमा इरानको सेनाले ‘मानवीय त्रुटिका कारण’ विमान खसालिएको जनाएकाे छ। विमानमा १७६ यात्रु सवार थिए।
सरकारी टेलिभिजनबाट सार्वजनिक गरिएको विज्ञप्तिअनुसार उक्त घटनामा संलग्न व्यक्तिहरुलाई कारबाही गरिने उल्लेख छ। बोइंग ७३७ युक्रेनी विमान बुधवार तेहरानमा दुर्घटनाग्रस्त भएको भएकाे थियाे।इरानले इराकस्थित अमेरिकी सैनिकहरू बसेका दुईवटा आधार शिविरमा क्षेप्यास्त्र आक्रमण गरेको केही घण्टापछि नै उक्त विमान दुर्घटना भएको थियो।
पहिले इरानले उक्त विमानलाई खसालेकाे इन्कार गर्दै थियो। तर, अमेरिका र क्यानडाले उनीहरुका सूचनाका आधारमा इरानले विमान खसालेकाे बताएका थिए। यसैबीच, इरानका विदेशमन्त्री जावद जरीफले ट्वीट गर्दै उक्त दिनलाई दुःखद् दिन भनेका छन्। उनले मानवीय त्रुटिले विपत्ती निम्त्याएकाे उल्लेख गरेका छन्।
