तितोपाटी – महिलाको साैन्दर्यको एक पाटो कपाल हो । सर्लक्क परेको चम्किलो कालो कपालले मुहारको सुन्दरतामा निखार ल्याउँछ । तर हामी नेपाली महिलाहरूमा अाजकल पश्चिमा फेसनको भुत चढेको कारण कपाल छोटो बनाउने देखि प्राकृतिक कपालको स्वरूप विगारेर रंगीविरंगी कपाल बनाउनेको प्रतिस्पर्धा नै हुने गरेको छ । संसार भर पुरूषले कपाल काट्ने र महिलाले कपाल राख्ने प्रचलन उत्पतिकाल देखिको चलि अाएको हो । सोही कपाल पालीरहँदा यति लामो हुन्छ कि गिनिज बुक अफ वर्ल्ड रेकर्ड नै कायम गर्न सकिन्छ । हाम्रो समाजमा कपाल मुठार्ने होड चलिरहँदा भारतमा भने कपाल पालेकै कारण एक किशोरीले विश्वरेकर्ड कायम गर्न सफल भएकी छन् ।
भारतीय किशोरी नीलांशी पटेल, १६, ले १० वर्षदेखि कपाल काटेकी छैनन् । ६ वर्षकी हुँदा कपाल छोट्याउन खोज्दा बिग्रिएको झोँकमा उनले कहिल्यै नकाट्ने संकल्प गरेकी थिइन् । उनको पाँच फुट सात इन्च लामो कपाल हालै गिनिज बुकमा दर्ता भएपछि देशी-विदेशी सञ्चार माध्यममा थामी नसक्नु चर्चा छ ।
लामो कपालकै कारण गुजराती नीलांशीलाई उनका साथीहरुले चर्चित कार्टुन पात्र ‘राम्पुञ्जेल’ भन्दै आएका छन् । ‘मानिसहरु मलाई लामो कपालका कारण, समस्या उत्पन्न हुन्न ? भन्दै प्रश्न गरिरहन्छन् ।’ उनी मुस्कुराउँछिन्, ‘कपालकै कारण मलाई समस्या भएको छैन । धेरै खेल्छु र दौडधूपमा हुन्छु । कपाल मेरा लागि लक्की चार्म हो ।’ खेलकुदमा भाग लिँदा कपाललाई गुजुल्टो पार्ने गरेको उनले बताइन् ।
