तितोपाटी – भारतको महाराष्ट्र स्थित रायगढ जिल्लामा आज (शनिबार) भएको बस दुर्घटनामा कम्तीमा ३३ जनाको मृत्यु भएको भारतीय सञ्चार माध्यमहरुले जनाएका छन। प्रहरीले दिएको जानकारी अनुसार उक्त बस दापोली कृषि विश्वविद्यालयबाट पिकनिकका लागि महाबलेश्वर जाँदै गर्दा अम्बेनाली घाट नजिकै सडकबाट करीब ५ सय फिट तल खसेको थियो।
प्रहरीले उक्त बसमा ३५ यात्रु सवार भएको हुन सक्ने अनुमान गरेको छ। दुर्घटनाबारे बसबाट हाम फाल्दै ज्यान बचाउन सफल भएका एक व्यक्तिले जानकारी गराएका थिए। बस सडकबाट तल रहेको खोल्सामा खस्दा उद्धारमा समस्या भईरहेको एक प्रहरी अधिकारीले बताए। दुर्घटनाको कारण हालसम्म खुल्न सकेको छैन।
