तितोपाटी – मलेसियाका पूर्वप्रधानमन्त्री नजिव रजाक मंगलबार पक्राउ परेका छन् । भ्रष्टाचारसम्बन्धी मुद्दामा पक्रा परेका रजाकलाई बुधबार मुद्दा लगाइने अधिकारीलाई उद्धृत गर्दै बीबीसीले जनाएको छ ।
उनीविरुद्ध राज्यकोषको चरम दुरुपयोग गरी ७ सय मिलियन डलर हिनामिना गरी आफ्नो बैंक खातामा सारेको आरोप छ । ६४ वर्षीय पूर्वप्रधानमन्त्री रजाकले सरकारी विकास कोष वान एमडीबीबाट रकम हिनामिना गरेको आरोप लगाइएको हो । यद्यपि रजाकले आफूले कुनै पनि सरकारी रकम दुरुपयोग नगरेको दाबी गर्दै आएका छन् ।
क्वालालम्पुरलाई एक आर्थिक केन्द्र बनाउने एवं रणनीतिक लगानीमार्फत अर्थतन्त्र सुदृढ बनाउने उद्देश्यका लागि सन् २००९ मा रजाकले वन एमडीबी स्थापना गरेका थिए । तर २०१५ को आरम्भतिर बैंक तथा वित्तीय संस्थामा लगानी गरेकालाई तिर्नुपर्ने ११ अर्ब डलर नतिरेपछि उक्त परियोजनाप्रति आशंका पैदा भएको थियो ।
त्यति बेला वन एमडीबी कोषबाट ७० करोड डलर रजाकका निजी ब्यांक खातामा सारिएको कागजपत्र आफूले फेला पारेको दाबी गर्दै वाल स्ट्रिट जर्नलले विवरण प्रकाशित गरेको थियो ।
वान एमडीबीको विषेश फौजले जारी गरेको विज्ञप्तिअनुसार उनी स्थानीय समयअनुसार २ बजेर ३५ मिनेटमा आफ्नो घरबाट पक्राउ परेका हुन् । विज्ञप्तिमा उनीविरुद्ध बुधबार बिहान ८.३० बजे राजधानी क्वालालम्पुरस्थित उच्च अदालतमा मुद्दा दायर गरिनेछ ।
भ्रष्टाचारको आरोप लागेसँगै आलोचित रजाकको गठबन्धन गत मे महिनामा भएको निर्वाचनमा पराजित भएको थियो । उनलाई राजनीतिक अभिभावक महाथिर मोहम्मद नेतृत्वको पार्टीले पराजित गरिदिएपछि रजाक सत्ताबाट बाहिरिएका थिए । निर्वाचनमा पराजित भएपछि रजाकलाई मलेसियाबाट बाहिरिनसमेत प्रतिबन्ध लगाइएको थियो । रजाकलाई पक्राउ गर्नु केही दिनअघि उनकी श्रीमती रोज्मा मन्सुर, छोरा रिज अजिज र पूर्वसहयोगी जाहिद हमिदीसँग पनि सोधपुछ गरिएको थियो ।
पछिल्ला केही साताहरूमा राजाकको व्यक्तिगत सम्पत्तिमाथि पटकपटक प्रहरीले छापा मारेको थियो । त्यस क्रममा २७ दशमलब ३ करोड अमेरिकी डलर मूल्य भएका विलाशिताका सामग्री र नगद बरामद गरेको प्रहरीले जनाएको छ ।
मलेसियाको इतिहासमा बरामद गरिएको ती सबैभन्दा मूल्यवान् सामग्री भएको बीबीसीले उल्लेख गरेको छ । तिनमा गरगहनाको भाग ठूलो थियो । हीरा र सुनको एउटा गलहारको मूल्य नै १६ लाख अमेरिकी डलर पर्छ ।
प्रहरीका अनुसार बरामद भएका अन्य सामग्रीमा ५ सय ६७ वटा हातेझोलामा राखिएको ३ करोड अमेरिकी डलर, ४ सय २३ वटा मूल्यवान् घडी र २ सय ३४ चस्मा थिए । बरामद भएका सामग्री गन्न र तिनको मूल्यांकन गर्न एक महिनाभन्दा बढी लागेको अधिकारीले जनाए । रोज्माको महँगा सामान किन्ने तथा ब्रान्डेड सामग्रीप्रतिको मोहबारे पटकपटक चर्चा हुने गरेको थियो । उनलाई फिलिपिन्सका पूर्व तानाशाह फर्डिनान्ड मार्कोसकी पत्नी इमेल्डा मार्कोससँग तुलना गर्ने गरिन्छ ।
