तितोपाटी – वामपन्थी उम्मेदवार आन्द्रेस मानुएल लोपेज ओब्रादोरले मेक्सिकोको राष्ट्रपतीय निर्वाचनमा विजय प्राप्त गरेको बताउँदै अब देशमा ‘गहन परिवर्तन’ आउन लागेको भनेका छन् ।
राजधानी मेक्सिको सिटीका पूर्वमेयरलाई आम्लो भनी चिनिन्छ र उनले कुल मतको ५३ प्रतिशत प्राप्त गर्ने प्रक्षेपण गरिएको छ । उनका प्रतिस्पर्धीहरूले हार स्वीकार गरिसकेका छन् ।
उनले भ्रष्टाचारको ‘खराबी’ लाई हटाउने प्रतिज्ञा गरेका छन् । भ्रष्टाचारकै कारण देशमा सामाजिक असमानता र हिंसा फैलिएको उनको भनाइ छ ।
उनले ज्येष्ठ नागरिकका लागि पेन्सन दोब्बर बनाउने अनि अमेरिकासँग मित्रवत सम्बन्ध कायम गर्ने वाचा गरेका छन् ।
अमेरिकामा डोनल्ड ट्रम्प राष्ट्रपति भएपछि वाशिङटनसँग मेक्सिकोको सम्बन्ध बिग्रिएको छ । ट्रम्पले मेक्सिकोलाई व्यापार र आप्रवासनका विषयमा कठोर आलोचना गर्ने गरेका छन् । आम्लोले जितेपछि ट्रम्पले बधाई दिँदै ट्वीट गरेका छन् ।
आइतवार राति अबेर यी ६४ वर्षीय नेताले नागरिक स्वतन्त्रतालाई सम्मान गर्ने र निरंकुशताका लागि कुनै ठाउँ नदिइने बताए ।
