स्थानीय तहको निर्वाचन-२०७९ को मतदान अहिले बिहान सात बजेदेखि नेपालभर सुरु भएको छ ।
संविधानले निर्धारण गरेको हरेक ५ वर्षमा हुने स्थानीय तह निर्वाचन अन्तर्गत यसपाली दोस्रोपटक स्थानीय तह निर्वाचन हुन लागेको हो । वि. सं. २०७४ सालमा निर्वाचित जनप्रतिनिधिको पाँचवर्षे कार्यकाल जेठ ५ मा सकिँदै छ । नयाँ जनप्रतिनिधिको कार्यकाल जेठ ६ देखि सुरु हुनेछ।
बहुदलीय व्यवस्था पुनर्बहालीपछि पहिलोपटक एकै चरणमा स्थानीय तह निर्वाचन हुँदै छ । कपिलवस्तुको महाराजगन्ज नगरपालिकाबाहेक ७५२ पालिकामा बिहान ७ देखि बेलुका ५ बजेसम्म निर्वाचन हुनेछ ।
निर्वाचनमा १ करोड ७७ लाख ३३ हजार ७ सय २३ जनालाई मताधिकार छ । देशभर १० हजार ७ सय ५६ मतदान केन्द्र निर्धारण गरिएको छ । निर्वाचनमा ६५ राजनीतिक दलबीच प्रतिस्पर्धा हुँदै छ । ७९ वटा राजनीतिक दलले निर्वाचनमा भाग लिने जनाए पनि ६५ वटाले मात्रै उम्मेदवारी दिएका छन् । निर्वाचन आयोगका अनुसार १ लाख ४५ हजार ११ जनाले उम्मेदवारी दिएका छन् ।
यससँगै नेपाल र नेपालीका लागि लामो प्रतीक्षाको दिन अन्त्य भएको छ । सङ्घीय शासन व्यवस्थाअन्तर्गत स्थानीय तहका लागि दोस्रो निर्वाचनको दिन आज नेपालीका लागि ठूलो पर्व, ठूलो महोत्सव र एक किसिमको ठूलो मेला पनि हो । नेपाली जनता यो महोत्सवमा सहभागी हुन उत्साहित रहेको पाइएको छ । फेरी पनि जुन ठाउँको मतदाता नामावलीमा नाम छ त्यहीँ पुगेर मतदान गर्नुपर्ने बाध्यता हुँदा कतिपय देश भित्रकै मतदाता मतदाता नामावली भएको स्थानमा पुग्न नसक्दा मताधिकारबाट बन्चित हुनु परेको छ भने नेपालमा अनलाइन मार्फत भोटिङको व्यवस्था गर्न नसक्दा विदेशमा रहेका नेपालीले मतदानमा सहभागिता जनाउन नपाउनु अर्को पीडा रहेको छ ।
