तितोपाटी – इंग्ल्यान्ड रसियामा जारी विश्व कप फुटबलको क्वार्टरफाइनलमा पुगेको छ । मंगलबार राती सम्पन्न खेलमा इंग्ल्यान्डले टाइब्रेकरमा कोलम्बियालाई ४–३ ले पराजित गर्दै इंग्ल्यान्ड अन्तिम आठमा पुगेको हो ।
निर्धारित समय र अतिरिक्ति समयमा कोलम्बिया र इंग्ल्यान्डबीच १–१ को बराबरी भएपछि खेल टाइब्रेकरमा गएकोे थियो । टाइब्रेकरमा इंग्ल्यान्डका गोलरक्षक पिक फोर्डले बाका र उर्वियनको प्रहार रोक्दै टिमलाई क्वार्टरफाइनलमा लगे ।
कोलम्बियाका गोलरक्षक ओस्पिनले हर्डसनको पेनाल्टी सुटलाई डाइभ गरी बचाएका थिए । इङ्ल्यान्डले पेनाल्टीमार्फत ५७ मिनेटमा अग्रता लिएको थियो । कार्लोस सान्चेजले कर्नर किकमा डिबक्सभित्र कप्तान ह्यारी केनलाई लडाएपछि प्राप्त पेनाल्टीमा कप्तान केनले नै गोल गरे । केनको विश्वकपमा ६ गोल पुरा भएको छ । उनी जारी विश्वकपमा सर्बाधिक गोल गर्ने खेलाडी बनेका छन् ।
पेनाल्टी सुटआउटमा सुरुका २–२ पेनाल्टीमा दुवै टोलीले गोल गरेका थिए । कोलम्बियाका कप्तान राडामेल फाल्काओले पहिलो पेनाल्टीमा गोल गर्न सफल भए । इंग्ल्यान्डका लागि कप्तान ह्यारी केनले पनि पेनाल्टीमा गोल गरे ।
बार्सिलोनाका स्टार डिफेन्डर येरी मिनाले निर्धारित ९० पछि थप गरिएको तेस्रो मिनेटमा हेडिङमार्फत गोल गरेपछि खेल नाटकीय रुपमा अघि बढ्यो । पराजयको निकट रहेको कोलम्बियालाई मिनाले उकासेपछि खेल अतिरिक्त समयमा पुग्यो । तर, अत्तिरिक्त समयमा पनि गोल हुन नसकेपछि टाइब्रेकरमा पुगेको थियो ।
दोस्रोमा कोलम्बियाका हुवा काड्राडोले र इंग्ल्यान्डका मार्कुस रासफोर्डले गोल गर्दा खेल टाइब्रकेरमा २–२ को बराबरी भएको थियो । तेस्रोमा कोलम्बियाका लुइस मुरियलले गोल गरे भने इंल्यान्डका जोर्डन हेन्डर्सनको प्रहारलाई कोलम्बियाका गोलकिपर डेभिड ओस्पिनाले रोके ।
कोलम्बियाका लागि चौथो पेनाल्टी प्रहार गरेका मेटेउस उरिबीको प्रहार पोस्टमा लाग्यो । इंग्ल्यान्डका केरन ट्रिपरले गोल गर्दै खेललाई ३–३ को बराबरीमा पुर्याए । कोलम्बियाका कार्लोस बाकाको प्रहारलाई इंग्ल्यान्डका गोलकिपर जोर्डन पिकफोर्डले रोके । इंग्ल्यान्डका लागि इरिक डियरले गोल गरेपछि टोली ४–३ ले विजयी भएको थियो ।
