Monday 16th November 2026

अर्जेन्टिनाद्वारा इजरायलसँगको खेल रद्द


तितोपाटी – विश्वकपको तयारी गर्न इजरेलसँग खेल्न तय भएको मैत्रीपू्र्ण खेल गाजामा प्यालेस्टिनीहरूप्रति इजरेलले गरेको व्यवहारका कारण उत्पन्न दबाबका माझ आर्जेन्टिनाले रद्द गरेको छ।

आर्जेन्टिनाका स्ट्राइकर गोन्सालो इग्वाइनले मङ्गलवार ईएसपीएन स्पोर्ट्स च्यानलसँग कुरा गर्दै भने, “आखिरमा सही निर्णय भएको छ।”

सञ्चारमाध्यमहरूमा आएका विवरणअनुसार इजरेलका प्रधानमन्त्री बेन्जामिन नेतान्याहुले शनिवार खेलिने भनेको उक्त म्याच रद्द नगर्न अनुरोध गर्दै आर्जेन्टिनाका राष्ट्रपति मौरिसियो माक्रीलाई फोन गरेका थिए।

सो खेल रद्द भएको समाचार सुनेर गाजामा ताली बजाइएको छ। त्यहाँ भएका पछिल्ला विरोध प्रदर्शनहरूका क्रममा कम्तीमा १२० जना प्यालेस्टिनीहरूलाई इजरेली फौजले मारिदिएका छन्।
‘मेस्सीलाई धन्यवाद’
वेस्ट ब्याङ्कस्थित रमल्लाहमा प्यालेस्टिनी फुटबल सङ्घले एक विज्ञप्ति प्रकाशित गर्दै आर्जेन्टिनी स्ट्राइकर लियोनेल मेस्सी तथा अन्य खेलाडीलाई धन्यवाद दिएको छ।

“नैतिक तथा खेलको मूल्यले आज जितेको छ। खेल रद्द गरेर इजरेललाई रातो कार्ड देखाइएको छ,” सङ्घका प्रमुखलाई उद्धृत गर्दै रोएटर्स समाचार संस्थाले जनाएको छ।

खेल रद्द हुनुअघि उनले प्यालेस्टिनीहरूलाई मेस्सीका तस्बिर र जर्सी जलाउन आग्रह गरेका थिए।

रुसमा केही समयपछि सुरु हुन लागेको विश्वकप प्रतियोगिताअघि यो आर्जेन्टिनाको अन्तिम खेल हुँदै थियो। सो खेल वेस्ट जेरुसलेममा खेलाइँदै थियो।
जेरुसलेमको हैसियत निकै संवेदनशील छ। इजरेलले जेरुसलेमलाई उसको अविभाज्य राजधानी मान्छ।

प्यालेस्टिनीहरूले चाहिँ सहरको पूर्वी भागलाई भविष्यको आफ्नो प्यालेस्टिनी राज्यको राजधानी मान्छन्।

हाइफा सहरबाट जेरुसलेममा खेल सारिएपछि प्यालेस्टिनीहरू क्रुद्ध भएका थिए।

-बिबिसीबाट


सम्बन्धित शीर्षकहरु

अन्तर्राष्ट्रिय समाचार | १५ नोभेम्बर २०२६ / भारतले बंगलादेशकी पूर्वप्रधानमन्त्री शेख हसिनालाई स्वदेश फर्काउन सहजीकरण गर्न सक्ने संकेत दिएको छ।…

वरिष्ठ नेपाली अभिनेत्री गौरी मल्ल र हास्य कलाकार मनोज गजुरेललाई प्रहरीले पक्राउ गरेको भन्दै सामाजिक सञ्जालमा भाइरल भएको भिडियो भ्रामक…

काठमाडौं | जलवायु कूटनीति / नेपालका परराष्ट्रमन्त्री शिशिर खनालले संयुक्त राष्ट्रसंघीय जलवायु परिवर्तनसम्बन्धी महासन्धिका पक्ष राष्ट्रहरूको ३१औँ सम्मेलन (कोप–३१) मा…

प्रतिकृयाहरू
...