तितोपाटी – अबको १६ दिन पछि शुरु हुने फिफा विश्वकप फुटबलको तयारीमा रहेको अर्जेन्टिनाले मैत्रीपूर्ण खेलमा जित हात पारेको छ । उसले हाइटीलाई ४–० गोलअन्तरले पराजित गरेको हो ।
आज विहान भएको खेलमा अर्जेन्टिनाले सहज जित निकालेको हो ।
इस्टाडियो अबलेर्टो जोस अर्मान्डो रंगशालामा भएको खेलमा घरेलु टोली अर्जेन्टिनाको जितमा कप्तान लियोनल मेस्सीले ह्याट्रिक गोल गरे ।
खेलको १७औं मिनेटमा नै मेस्सीले गोल गर्दै अर्जेन्टिनालाई अग्रता दिलाएका थिए ।
पहिलो हाफसम्म १–० गोलअन्तरले अघि रहेको अर्जेन्टिनाले दोस्रो हाफमा थप ३ गोल गरेको थियो ।
खेलको ५८औं मिनेटमा अर्को गोल गर्दै मेस्सीले अर्जेन्टिनालाई २–० गोलको अग्रता दिलाएका थिए ।
खेलको ६६औं मिनेटमा कप्तान मेस्सीले अर्को गोल गर्दै ह्याट्रिक गोल पूरा गरेका थिए ।
त्यस्तै, खेलको ६९औं मिनेटमा सर्जियो अगुइरोले गोल गर्दै अर्जेन्टिनालाई ४–० गोलको जित दिलाएका हुन् ।
